Almatyda shytyrman oqıǵaly IV "KAZAKHSTAN AdventureRase 2011" jarysy ótedi
ALMATY. 30 qyrkúıek. QazAqparat /Erlik Erjanuly/ - Almatyda 1-2 qazan kúnderi "KAZAKHSTAN AdventureRase 2011" jarysy uıymdastyrylady.
Bıyl tórtinshi ret ótkeli otyrǵan bul sharany LUMEN.KZ jáne Tótenshe jaǵdaılar mınıstrliginiń Respýblıkalyq jedel-qutqarý otrıadynyń qoldaýymen "Ekstremaldy atletıka" qoǵamdyq birlestigi men "MT Sport Presentation" JShS uıymdastyryp otyr. Jarystyń bazalyq lageri Úlken Almaty shatqalyndaǵy Aıý saı toǵaıynda ornalaspaq.
Ortalyq Azııa aımaǵyndaǵy balamasy joq bul jarys jylyna 1 ret uıymdastyrylady. Oǵan bıyl Qazaqstan, Qyrǵyzstan jáne Reseıden 49 komanda (98 adam) qatysqaly otyr. Olar daıyndyq deńgeıine qaraı: Extreme, Classic, Fitness degen 3 topqa jiktelmek. Máselen "Fitness" jiktelimindegiler - 6, al ózgeleri 24 saǵat boıy velosıpedpen (MTV) jáne júgirý men jaı júristen saıysqa túspek. Olar ojartasqa órmeleý, taý ózeninen ótý men sarqyramadan jyldam túsý sııaqty túrli syndardan ótetin bolady.
