Almatyda shyrsha saýdasy qyzyp tur

ALMATY. QazAqparat - Shyrsha - Jańa jyldyń basty nyshany. Jańa jyldy qyzyl-jasyl shammen kómkerilgen ásem shyrshamen qarsy alýdy dástúrge aınaldyrǵandar, ony qansha teńgege satyp alady? Suranysqa qanshalyqty ıe? Osy suraqtarǵa QazAqparat tilshisi jaýap izdep kórdi.

Qazir Almatyda shyrsha saýdasy qyzyp tur. Dúkender men bazarlardan qylqan japyraqtylardyń neshe túrin tabasyz. Baǵasy da áralýan.

Saýdagerler jeltoqsannyń sońǵy kúnderinde shyrshaǵa suranys tipten artatynyn aıtady, soǵan oraı bıyl baǵasy da kóterilipti.

«Bıyl shyrsha baǵasy ótken jylmen salystyrǵanda 20-30 paıyzǵa qymbattady. Adamdar negizinen jasandy shyrshany tańdaıdy. Óıtkeni ony jylda qoldanýǵa bolady. Qazir jasandy shyrshanyń alýan túri bar. Aq, jasyl, oıynshyq ilingen, tóbesin qar basqan shyrshalar da bar. Jasandy shyrshanyń baǵasy 5 myń teńgeden bastalady», - deıdi satýshy Janserik Taǵabaı.

Satýshylar jyldan-jylǵa tabıǵı shyrshany qoldanýshylardyń qatary azaıyp kele jatqanyn aıtady.

« Qýanarlyǵy jyldan-jylǵa tabıǵı shyrshany qoldanýshylardyń qatary azaıyp barady. Al jasandy shyrshanyń baǵasy qoldanylǵan materıalǵa baılanysty. Negizi Eýropadan jetkizilgen shyrsha qymbat. Al Qytaı shyrshasy arzan bolady»,- dedi satýshy.

Almatydaǵy sýpermarketter men dúkenderde jasandy shyrshalardyń baǵasy bazarmen salystyrǵanda áldeqaıda qymbat.

Mysaly, bıiktigi 180 sm jasandy shyrsha 18-20 myń teńge kóleminde. Eki metrlik shyrsha 30 myń teńge jáne odan joǵary.

Tálimbaqta ósken, ıisi ańqyp turǵan sulý shyrshanyń baǵasy 35 myń teńgeden bastalady.

« Satýǵa arnalǵan tabıǵı shyrshany kóbi jeke tálimbaqta ósiredi. Keıbireýleri Reseı, Qyrǵyzstan, Qytaı sııaqty basqa elderden ákeledi. Degenmen, satýshylardyń tiri shyrshalardy satýǵa ruqsaty bolýy kerek. Bıylǵy jyly reıd barysynda zańsyz aǵash kesý nemese satý faktileri tirkelgen joq. Shyrshany zańsyz keskender qylmystyq jáne ákimshilik jaýapkershilikke tartylady», - dep jaýap berdi Almaty qalasy tabıǵatty qorǵaý polıtsııasynyń bastyǵy Nurlan Qarpyqov.

Aıta keteıik, Jańa jyl qarsańynda quqyq qorǵaýshylar tekserý sharasyn kúsheıtti. Mundaǵy maqsat merekelik suranysty paıdalanyp, jasyl jelekti zańsyz satýdyń aldyn alý.

Ásirese, ulttyq park aýmaǵyna kirip-shyǵatyn kólikter jiti tekserilip jatyr. https://www.kazinform.kz/kz/ile-alatauy-memlekettik-tabigi-ulttyk-parkindegi-shyrshalar-kuni-tuni-kuzetiledi_a3876942