Almatyda Shyńǵys Aıtmatovtyń «Teńiz jaǵalaı júgirgen tarǵyl tóbet» povesi sahnalandy
ALMATY. 22 qazan. QazAqparat /Názıra Eleýhan/ - Ǵ. Músirepov atyndaǵy Qazaq Memlekettik Akademııalyq balalar men jasóspirimder teatrynda alǵash ret áıgili jazýshy Shyńǵys Aıtmatovtyń ata-baba dástúrin,
urpaqtar sabaqtastyǵyn saqtaýǵa úndeıtin "Teńiz jaǵalaı júgirgen tarǵyl tóbet" atty povesi sahnalandy.
Qoıylymnyń premerasyn tamashalaýǵa ónersúıer qaýym kóp jınaldy.
Bul spektakl - rejısser Talǵat Temenovtiń kózimen sýrettelgen. Oqıǵa jelisi boıynsha bir áýlettiń tórt er azamaty qaıyqpen ashyq teńizge ańǵa shyǵady da, qoıý tuman arasynda úsh kún boıy joldan adasady. Álderi quryp, ábden shól qysyp, sharshaǵan eresek úsheýi qumyradaǵy sońǵy bir jutym sýdy urpaq jalǵastyǵy aman qalsyn dep, aralaryndaǵy eń jas balaǵa qaldyrady da, biriniń izinen biri aqyrǵy saparǵa attanady.
"Osyndaı qaıǵy-qasiretke toly dastandy jas kórermenge túsinikti etip jetkizý ońaıǵa túspedi. Eń negizgisi - biz Shyńǵys Tóreqululynyń oıyn, fılosofııasyn, lırıkasyn sahnaǵa shyǵardyq. Óıtkeni kórermen sony qabyldaıdy, kórermen sony baǵalaıdy",-dedi spektakldiń rejısseri Talǵat Temenov.
Onyń aıtýynsha, qoıylym jaqyn arada Reseıdiń Taýly Altaı ólkesinde ótetin «Kók Táńiri» atty teatrlar festıvaline qatysady.
