Almatyda shyǵys qoljazbalary men kitaptaryn qalpyna keltirý jáne túpteý jóninde tájirıbelik semınar ótip jatyr

Semınarǵa QR Ulttyq kitaphanasy, QR Ortalyq memlekettik murajaıy men QR Ortalyq memlekettik muraǵatynyń mamandarymen qatar, elimizdiń ár oblystarynan kelgen 30-dan asa sırek kitaptardy qalpyna keltirýshi mamandar qatysýda. Semınar teorııalyq jáne tájirıbelik dáristerden turady. Ony Frantsııanyń Ulttyq kitaphanasynyń qalpyna keltirý jónindegi sarapshysy Terrı Obrı júrgizýde. Búgin túske deıingi ótken semınar barysynda sarapshy shyǵys jáne batys qaǵazdaryn daıyndaý tehnologııalarymen, onyń qurylymdyq erekshelikterimen, sonymen qatar, atalmysh qaǵazdardyń buzylý sebepterimen tanystyrdy. Al, tústen keıingi tájirıbelik dáriste ol shyǵys jáne batys qaǵazdaryna kúrish krahmalynan jelimdi qalaı daıyndaý kerek ekendigin kórsetýde. Jalpy 10 kúnge sozylatyn semınar barysynda Terrı Obrı kóne qoljazbalar men sırek kezdesetin kitaptardy qalpyna keltirýdiń búgingi zamanǵy ádis-tásilderin, túpteýdiń jańa tehnologııalaryn, shyǵys qoljazbalaryn qaıta qalpyna keltirýge qajetti zamanaýı materıal túrlerimen tanystyrmaq.

QR Ulttyq kitaphanasy Bas dırektorynyń birinshi orynbasary Zarema Shaımardanovanyń aıtýynsha, semınardyń basty maqsaty - otandyq mamandarǵa shyǵys qoljazbalary men kitaptaryn qalpyna keltirý men túpteý jóninde tájirıbe jınaqtaýyna yqpal etip, kásibı biliktiligin kóterýge úles qosý bolyp tabylady.

"Bul semınar ıÝNESKO-nyń Klasterlik Bıýrosynyń qoldaýymen júzege asyrylýda. Shara barysynda semınarǵa qatysýshylar sırek kitaptardy saqtaýdyń qyr-syrymen tanysyp qana qoımaı, biliktilikterin arttyratyn bolady jáne odan keıin óz oblystarynda bilgen-kórgenin basqa mamandarǵa úıretip, qyzmet tájirıbesine engizedi. Semınardy júrgizýge arnaıy shaqyrylǵan sarapshy bul salanyń qyr - syryn biletin, ásirese shyǵys qoljazbalaryn túpteý men qalpyna keltirýdiń kásibı mamany, negizinen álemde shyǵys qoljazbalaryn jaqsy biletin maman az. Elimizde kitap túpteýshiler men shyǵarýshylar daıyndalady, al qaıta qalpyna keltirýshi mamandar kóbine ózdiginen úırenýshiler, bizde ondaı mekteptiń joq bolǵandyǵynan shet elden osy istiń mamanyn arnaıy shaqyryp otyrmyz",-dedi ol.

Shymkent qalasynyń Pýshkın atyndaǵy oblystyq ámbebap ǵylymı kitaphanasynyń kitap qoryn tolyqtyrý meńgerýshisi Asylzat Arystanovanyń aıtýynsha, Qazaqstanda sırek qordy qorǵaý, saqtaý, qalpyna keltirý jaǵdaıy damyǵan eldermen salystyrǵanda tómengi orynda. "Al, Ortalyq Azııamen salystyrǵanda ortańǵy orynda tur. Árbir kitaphanashynyń maqsaty - qoldaǵy bar qundylyqtarymyzdy - eldiń arasyndaǵy sırek kezdesetin kitaptardy, qazaqstandyq kitaphanalardyń qorynda bar sırek kitaptar men qoljazbalarymyzdy barynsha keler urpaqqa sol qalpynda jetkizý. Osy suraqpen, sırek kitaptardy qaıta qalpyna keltirý máselesi tóńiregende kitaphanashylardyń dabyl qaqqanyna birshama ýaqyt boldy. Bul másele úlken minberlerde de aıtyldy. Sonyń nátıjesinde qazirgi ýaqytta sırek qorlardy saqtaý men damytý jaqsy orynǵa qoıylyp, aqyryndap sheshilip kele jatyr. Búgingi ótip jatqan, eki aptalyq semınar sonyń nátıjesi desek bolady",-dedi ol.

Asylzat Arystanova sonymen qatar, qundy jazbaralymyzdy saqtaý boıynsha óz oı-pikir, usynysyn bildirdi. "Damyǵan elderde, máselen Arab elinde sırek qordy qorǵaýǵa arnalǵan qorlar jumys isteıdi. Ol qorlarǵa qomaqty qarjy bólinip, ol qarajat tek qana sırek qordy qalpyna keltirý men urpaqqa jetkizýge ǵana jumsalady. Ókinishke oraı, bizdiń elimizde mundaı qor joq. Bizdiń armanymyz - elimizde osyndaı qor qurylsa, tipti bul árbir kitaphanashynyń armany desem de bolady. Ekinshiden, el qolynda, ata-babasynan mura bolyp qalǵan kitaptar kóp, ol kitaptar arnaıy mekemelerge ótkizilmese de, esepke alynyp, tizimge engizilýi qajet. Úshinshiden aıtarymyz, ár oblys qoljazbalar men kitaptardy qalpyna keltirý jáne túpteýge arnalǵan jańa tehnologııalarmen qamtamasyz etilse, óıtkeni, tek Almaty men Astana qalasyndaǵy ulttyq kitaphana ǵana zamanaýı tehnologııalarmen jabdyqtalǵan. Biz keler urpaqqa qundy da, qasıetti qorlarymyzdy jetkizýimiz tıis. Meniń oıymsha, jańa qondyrǵylardy ornatýǵa eldiń qudireti de, múmkindigi de jetkilikti. Sırek qorǵa áli de memleket tarapynan kóńil bólý qajet",-deıdi ol.