Almatyda Shyǵys aınalma jolynyń ýaqytsha júrý bóliginde kólik qozǵalysy ashyldy
ALMATY. Qyrkúıektiń 27-si. QazAqparat /Erbol Azanbek/ - Búgin Almatyda jańadan salynyp jatqan Shyǵys aınalma jolynyń ýaqytsha júrý bóligi ashyldy. Jańa jolmen alǵashqylardyń biri bolyp qala ákimi Ahmetjan Esimov ótti.
Esterińizge sala keteıik, qalanyń ortalyq bóliginde kólik keptelegin azaıtý jáne ońtústik-soltústik, shyǵys-batys baǵyttarda kedergisiz júrý maqsatynda Shyǵys aınalma jolyn salý qolǵa alynǵan edi. Almatynyń bas jospary men «2003-2010 jyldar aralyǵynda Almaty qalasyn damytý memlekettik baǵdarlamasy» aıasynda júzege asyrylyp jatqan joba 2007 jyldyń sáýir aıynda bastalǵan bolatyn. Jalpy uzyndyǵy 7,8 shaqyrymdyq jol ál-Farabı -Dostyq dańǵyldarymen, Halıýllın kóshesi, Kishi Almaty ózeni, Lýganskıı, Gornyı kósheleri, Jarbulaq ózenin basyp ótip Qulja jolyna deıin jetedi. Qazirgi kezde joldyń 5,6 shaqyrymy salynyp bolǵan. Qalǵan bóliginde ýaqytsha júrý joly iske qosylady.
Búgingi shara barysynda qala ákimi Ahmetjan Esimov joldyń keler jyly tolyq aıaqtalatynyn jetkizdi. «Búgin joldyń ýaqytsha júrý bóligin ashyp turmyz. Keler jyly tolyq aıaqtalǵan soń bul jol arqyly Almatyǵa kirmeı-aq Talǵar qalasy men Qulja avtodańǵylyna kedergisiz jete alamyz. Bul bir shetinen qalanyń kólik keptelegin azaıtsa, ekinshi jaǵynan ekologııaǵa oń áser etedi »,- dedi A.Esimov.
