Almatyda shot-faktýrany elektrondy formatta toltyrmaǵan kásipkerlerge aıyppul salynady
ALMATY. QazAqparat - Almatylyq kásipkerler taýar men qyzmetin satý kezinde 2019 jyldyń 1 qańtarynan bastap shot-faktýrany elektrondy formatta tapsyrýǵa mindetteledi, dep habarlaıdy QazAqparat tilshisi qalalyq Memlekettik kirister departamentiniń baspasóz qyzmetine silteme jasap.
Salyq zańnamasyna engizilgen ózgertýge baılanysty 2019 jyldyń 1 qańtarynan bastap qosylǵan qun salyǵyn tóleıtin kásipkerlerdiń barlyǵy shot faktýralardy elektrondy túrde tapsyrýy kerek bolatyn.
«Elektrondy shot-faktýralar» aqparattyq júıesi QR Qarjy mınıstrligi Memlekettik kirister komıtetiniń saıtynda (kgd.gov.kz) jarııalanǵan.
«Aqparattyq júıeni qosý úshin aldymen HQO-ǵa baryp, elektrondy qoltańba alý kerek. Zańdy tulǵalar uıym basshysynyń atyna elektrondy qoltańba alýy kerek. Al jeke kásipkerlerge tek jeke kásipkerlik atynan ETsQ alsa bolady. Ol úshin Elektrondy úkimettiń esf.gov.kz saıtyna tirkelý kerek. Bul tártipti saqtamaǵan kásipkerlerge ákimshilik jaza qarastyrylǵan. Kásipker birinshi ret shot-faktýra toltyrmasa, eskertý jasalady. Ekinshi ret toltyrylmasa, salyq tóleýshige aıyppul salynady. Shaǵyn kásipkerlikpen aınalysatyndarǵa - 40 AEK, orta kásipkerlikpen aınalysatyndarǵa - 100 AEK, iri kásipkerlerge 150 AEK kóleminde aıyppul salynady», - dedi departamenttiń baspasóz qyzmetinen.
Salyq organdary kásipkerlerge jyl sońyna deıin «Elektrondy shot-faktýra» júıesine tirkelýge keńes beredi.
Aıta ketý kerek, departamenttiń taratqan məlimetterine səıkes, Almatyda 25 myń QQS tóleýshiniń 19 myńy ǵana «Elektrondy shot faktýra» júıesinde tirkelgen.
6 myń kásipker júıege tirkelýge asyǵystyq tanytpaı otyr. Jyl sońyna deıin 45 jumys kúni qaldy. Tirkelý barynsha jeńildetilgen. Salyq tóleýshiler salyq organdaryna kelmeı-aq onlaın túrde tirkele alady. Eger bul rásim jasalmasa, onda olar shot faktýra jazý múmkindiginen aıyrylady.
