Almatyda shomylý maýsymy bastalǵaly 10 adam qutqaryldy
Onyń aıtýynsha, úsh jylda 64 adam, onyń ishinde 30 bala qutqarylǵan.
Sonymen qatar, ol qazir kúnniń salqyndaýyna baılanysty sýǵa shomylý asa qaýipti ekenin atap ótti.
«Adam aǵzasy sýda tońyp qalsa jazataıym oqıǵa urynýy múmkin, sińiri tartylyp qalýy yqtıımal»,– dedi TJD Azamattyq qorǵanys basqarmasynyń basshysy.
Ishar Savazovtyń sózinshe, qutqarýshylar jergilikti polıtsııa qyzmetkerleri, QR Ulttyq ulan 5571 áskerı bólimniń áskerı qyzmetshilerimen, Qyzyl Jarty Aı qoǵamynyń, eriktiler uıymynyń ókilderimen birlesip kún saıyn sý aıdyndarynda reıd ótkizedi. Jaǵajaıǵa zańdy ókilderinsiz keletin balalarmen profılaktıkalyq áńgime júrgizedi, eresektiń baqylaýynsyz sýǵa shomylýdyń qaýipti ekenin túsindiredi.
Qutqarýshylar demalys jáne mereke kúnderi kúsheıtilgen rejımde jumys isteıdi. Bıyl qalada sýǵa shomylý maýsymynda, qutqarýshylar 10 adamdy qutqardy, onyń tórteýi bala. Jalpy osy maýsymda 800-den astam birlesken reıd ótkizilip, onyń barysynda «sýdaǵy qaýipsizdik» taqyrybyna arnalǵan 7 800-den astam ún paraq taratyldy.
Osyndaı patrýlderdiń arqasynda qoǵamdyq orynda ishimdik ishken 34 ereje buzýshy anyqtaldy. Barlyq tulǵalar QR ÁQBtK-niń 440-baby boıynsha ákimshilik jaýapqa tartyldy. Aıyppuldyń jalpy somasy 495 890 teńge.
«Belgilenbegen orynda sýǵa túskeni úshin 364-bap boıynsha «ortaq sý paıdalaný erejelerin buzý» boıynsha 7 adam jaýapqa tartyldy. Tártip buzýshylarǵa qatysty eskertý sharasy qoldanyldy», – dedi Ishar Savazov.
TJD Azamattyq qorǵanys basqarmasynyń basshysy Almaty turǵyndary men qonaqtaryn jaǵadan alys júzbeýge, ruqsat etilgen jerde ǵana shomylýǵa shaqyrdy.
«Eger siz júze almaıtyn bolsańyz, ruqsat etilgen jerde shomylsańyz da, belden joǵary sýǵa kirmeńiz. Balalardy qaraýsyz qaldyrmańyz. Qaıyq, kópir jáne aılaqtardan sýǵa sekirmeńiz, uzaq ýaqyt júzbeńiz, tońyp jáne sharshap qalýyńyz múmkin. Sondaı-aq, túngi ýaqytta jáne mas kúıde shomylý qaýipti», – dep atap ótti ol.
