Almatyda ShOB sýbektileri jyl sońyna deıin saqtandyrý jarnasynan bosatyldy

ALMATY. QazAqparat - Shaǵyn jáne orta bıznes nysandary jyl sońyna deıin medıtsınalyq saqtandyrý tólemderinen bosatyldy. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıalynyń baspasóz qyzmeti málimdedi, dep habarlaıdy QazAqparat tilshisi.

QR Prezıdentiniń 14 qyrkúıektegi №413 Jarlyǵy boıynsha ekonomıkanyń pandemııadan meılinshe zardap shekken salalaryndaǵy shaǵyn jáne orta bıznes nysandary bıýdjetten tys qorlarǵa tólenetin tólemderden bosatylǵan.

Bıznes sýbektilerine buǵan deıin de 2020 jyldyń sáýiri men qazan aılary aralyǵynda alty aılyq jeńildik berilgen bolatyn.

«Salyqtar men áleýmettik tólemderdi tóleý mindetinen bosatylǵan ShOB nysandarynyń tizimi kóktemde jasalǵan bolatyn. Olardyń qatarynda saýda-sattyq, kólik jáne tehnıkalyq qyzmet kórsetý, bilim, medıtsına, týrızm, meıramhana-qonaq úı bıznesi, oıyn-saýyq, baǵdarlamalyq qamsyzdandyrý nysandary, fıtnes klýbtary bar. Endi bıznesti qoldaý maqsatynda jeńildik merzimi jyl sońyna deıin uzartylyp otyr», - dedi fılıal dırektory Tileýhan Ábildaev.

Tólemderden bosatylǵan jumys berýshiler qaramaǵyndaǵy qyzmetkerlerin saqtandyrýmen qamtamasyz etýdi esten shyǵarmaǵany jón. Qyzmetkerler MÁMS paketine enetin medıtsınalyq qyzmet túrlerin kedergisiz alýy úshin olardyń tizimin Qordyń aqparattyq júıesine engizip, ýaqtyly jańartyp otyrýy tıis.

Esterińizge sala ketsek, Almaty boıynsha 116 604 shaǵyn jáne orta bıznes nysanyna jeńildik berilgen.

Jalpy, jumysshylarǵa qatysty málimetti bir ret engizse jetkilikti. Aldaǵy ýaqytta jumysqa jańadan alynǵan jáne jumystan shyqqan qyzmetkerler jaıly málimetti engizip otyrý qajet. Aqparat aı saıyn Memlekettik kiris komıtetine joldanady.