Almatyda shirigen aǵashtar kesilip, 50 myń kóshet otyrǵyzylady
ALMATY. QazAqparat - Almatyda 84 myń shirigen nemese qulaý qaýpi bar aǵash bar. Bul máseleni sheshý úshin olardy kezeń kezeńimen kesý jáne jas kóshetterge aýystyrý boıynsha arnaıy bes jyldyq baǵdarlama qabyldanǵan. Bul týraly Óńirlik kommýnıkatsııalar qyzmetiniń brıfıngisinde qalalyq ekologııa jáne qorshaǵan orta basqarmasy basshysynyń orynbasary Ulan Abdýldaev málim etti, dep habarlaıdy QazAqparat tilshisi.
Onyń aıtýynsha, bıyl 5 myń apatty aǵash kesilip, onyń ornyna 50 myń kóshet otyrǵyzylady.
«Aǵashtardyń jalpy sanynan 485 myńy jetilgen olar negizinen qalanyń ortalyq bóliginde. Sonymen qatar, Almatyda 84 myń shirigen ne qulaǵaly turǵan aǵash bar. Bul máseleni sheshý úshin olardy kezeń-kezeńimen kesý jáne jas kóshetterge aýystyrý boıynsha arnaıy bes jyldyq baǵdarlama qabyldandy. Bıyl 5 myń apatty aǵash kesilip, onyń ornyna 50 myń kóshet otyrǵyzylady»,- deıdi spıker.
Sonymen qatar, ol Almatyda 1 mıllıon aǵash otyrǵyzý boıynsha «Jasyl Almaty» baǵdarlamasy jalǵasyp jatqanyn atap ótti.
«1 mln aǵash otyrǵyzý boıynsha «Jasyl Almaty» baǵdarlamasyn júzege asyrý jalǵasýda. Aktsııa bastalǵaly 643 myń kóshet otyrǵyzylsa, 2022 jyldyń kókteminde 145 myń aǵash otyrǵyzyldy. Bıylǵy jyldyń sońyna deıin 360 myń jer telimi qaldy. Kógaldandyrý alańdary ǵalymdardyń pikirlerin eskere otyryp, dendrologııalyq josparǵa sáıkes belgilenedi», - dep atap ótti vedomstvo ókili.
Spıkerdiń sózinshe, alaıda Almatynyń barlyq aýdandary jasyl jáne abattandyrý alańdarymen maqtana almaıdy.
«Búgingi kúni jasyl jelektermen qamtamasyz etý birkelki emes. Mysaly, Alataý men Naýryzbaı aýdandarynda jetkiliksiz», – dedi Ulan Abdýldaev.
Sondaı-aq ol jalpy paıdalanylatyn jerlerde ósetin aǵashtar qalanyń jasyl ekpeleriniń biryńǵaı tizilimine engizilgenin eske saldy.
«Qalalyq jasyl keńistik tizimi júıesi negizinde jasyl keńistikterdiń túrleri, túr quramy, aýmaq kólemi, jaǵdaıy jáne ornalasýy týraly derekterdi únemi jańartyp otyrady.Sońǵy jyldary Almatyda qalalyq ekpelerge zııan keltiretin ınvazııalyq zııankester túrleriniń jappaı enýi baıqalýda»,- deıdi ol.
Basqarma aǵashtar men butalardy qorǵaý jáne jaqsartý sharalaryn qabyldaǵan.
«Biz bıologııalyq ónimder keshenin jáne feromon tuzaqtarynyń bıologııalyq agentterin qoldanamyz. Júrgizilgen jumystardyń arqasynda butalardyń zaqymdaný dárejesi 70-85%-dan 30-35%-ǵa deıin tómendedi»,- dep qosty spıker.
