Almatyda shıpajaıda emdelip jatqan jigit joǵalyp ketti
ALMATY. QazAqparat - Almatydaǵy «Kóktem» shıpajaıynda anasymen birge emdelip jatqan 1993 jyly týǵan Almat Qorǵandy ata-anasy taba almaı jatyr, dep habarlaıdy QazAqparat tilshisi.
Ol 2017 jyldyń 6 shildesi kúni keshki saǵat 20-26-da «Kóktem» shıpajaıy aýlasynan shyǵyp ketken. Onyń shyqqany beınebaqylaý kamerasyna túsken.
«Balam anasymen emdelip jatqan. 3 balam bar. Almat - úıdiń kenjesi. Ol 1993 jyldyń 28 qarashasy kúni dúnıege kelgen. Boıy 170-175 sm. Sol kúni qara fýtbolka, qara sporttyq shalbar, basynda aq tústi bas kıim kıgen bolatyn. 7 shilde kúni Bostandyq aýdany ІІB qyzmetkerleri kelip málimetter aldy. Bostandyq aýdany polıtseıleri 7 shildeden beri izdep jatyr, qaladaǵy arýhana, máıithanalardyń barlyǵyna aqparat joldady, ázirge eshqandaı habar joq. Balalarym Remızovka aýdanyndaǵy jeke kottedjderge baryp aqparat surady, olar beınekameralaryn kórsetýden bas tartyp otyr», deıdi Almattyń ákesi Sábıt.
Ákesiniń aıtýynsha, ol buǵan deıin de úıden ketip qalǵan.
«Osydan 5 jyl buryn joǵalyp ketip, 1 aptadan keıin Qostanaıdan tabylǵan bolatyn. Onda qaltasynda jeke kýáligi, aqshasy bolǵan. Bul joly eshteńesi joq. Barlyq qujaty shıpajaıda qalǵan. Anasyna keshke taza aýa jutyp qaıtamyn dep shyqqan. Artynan ilesip anasy de 5 mınýttan keıin shyqqan, biraq taba almaǵan. Minezi tuıyq, úıdiń sharýasyn jasaǵanymen, jumyssyz», deıdi Sábıt Qorǵan.
Almat Qorǵannyń ata-anasy uly týraly qandaı da bir aqparat bolatyn bolsa, 87750007761, 87013896114 telefondaryna habarlasýdy suraıdy.
