Almatyda sheteldik nómiri bar kólikterdi tirkeýge qatysty suraqtar boıynsha call-ortalyǵy quryldy
NUR-SULTAN. QazAqparat - Almatyda qalanyń ákimshilik polıtsııasynyń janynda EAEO elderinen alyp kelgen kólik quraldaryn tirkeýge qatysty suraqtar boıynsha call-ortalyq quryldy, dep habarlaıdy QazAqparat.
«Sall-ortalyǵynyń telefony – 8-747-080-01-56. Ol qala turǵyndarymen baılanys úshin, sonyń ishinde EAEO elderinen ákelingen kólik quraldaryn tirkeýge qatysty suraqtar boıynsha jumys isteıdi. Bul jaǵdaı Memleket basshysynyń erekshe baqylaýynda. Buǵan deıin Іshki ister mınıstrligi 2020 jyl 1 aqpandaǵy jaǵdaı boıynsha EAEO elderinen Qazaqstan azamattary jeke paıdalanýy úshin alyp kelgen avtokólikterdi ýaqytsha tirkeýdiń kezeń-kezeń algorıtmi týraly jarııalaǵan bolatyn. Bul avtokólikterdi tirkeý 2021 jyldyń 1 naýryzyna deıin júzege asady», - deıdi Ákimshilik polıtsııa basqarmasynyń basshysy, polıtsııa podpolkovnıgi Jandos Muratalıev.
Sonymen qatar, Polıtsııa departamenti call-ortalyq jumys kúnderi 09:00-19:00 aralyǵynda qońyraý qabyldaıtynyn aıtty. Kelip túsken suraqtarǵa bilikti mamandar jaýap beredi.
«Búgin elimizdegi barlyq qaladaǵy avtoHQO-da joǵaryda atap ótken suraqtar boıynsha azamattar qabyldanýda. Bizdiń bólimshe qyzmetkerleri quqyqtyq túsindirý jumystaryn uıymdastyrdy. Qazir men «Saıaly» yqshamaýdanyndaǵy Aqqaınar kóshesi, 1-úı mekenjaıynda ornalasqan arnaıy HQO-damyn. Tańǵy saǵat toǵyzdan túski ýaqytqa deıin 50 azamatqa keńes berildi», - deıdi ol.
