Almatyda sheteldik mamandar kózdiń qaterli isigine shaldyqqan balalarǵa operatsııa jasaıdy
ALMATY. QazAqparat- Almaty QR Densaýlyq saqtaý mınıstrliginiń Pedıatrııa jáne balalar hırýrgııasy ǵylymı ortalyǵynda Reseı mamandarynyń qatysýymen kózdiń qaterli isigi - retınoblastomany emdeýge arnalǵan sheberlik sabaǵy ótedi. Bul týraly Pedıatrııa jáne balalar hırýrgııasy ǵylymı ortalyǵynyń baspasóz qyzmeti málim etti, dep habarlaıdy QazAqparat tilshisi.
Baspasóz málimetterine qaraǵanda, bul búginde shetelde emdelýdi qajet etip otyrǵan balalar úshin taptyrmas múmkindik. Sheberlik sabaǵynda retınoblastomaǵa shaldyqqan balalarǵa selektıvti ıntraarterıaldy hımııalyq terapııa (SIAHT) júrgiziledi.
Pedıatrııa jáne balalar hırýrgııasy ǵylymı ortalyǵy mamandarynyń aıtýynsha, retınoblastomaǵa shaldyqqan naýqastardy jedel emdeý sharasy Qazaqstanda alǵash ret júzege asyrylmaq.
«Atalǵan operatsııa túri balalardyń kózderin saqtap qalýǵa múmkindik beredi. Operatsııanyń ereksheligi de osynda»-dedi mamandar.
Retınoblastomaǵa shaldyqqan tórt balaǵa operatsııa jasaý úshin Reseıden N.N.Blohın atyndaǵy Onkologııalyq ulttyq medıtsınalyq zertteý ortalyǵynyń dárigerleri - angıohırýrg I.A.Trofımov jáne anestezıolog L.A.Martynov arnaıy shaqyrylǵan.
Bolashaqta QR Densalyq saqtaý mınıstrligi bekitip jatatyn bolsa, reseılik mamandar kórsetken ádis Pedıatrııa jáne balalar hırýrgııasy ortalyǵynyń tájirıbesine engiziletin bolady.
