Almatyda sheteldik dárigerler biregeı ota jasady
Sheberlik sabaǵy Asfendııarov atyndaǵy QazUMÝ-dyń 88 jyldyǵyna arnalǵan shara aıasynda ótti.
Qalalyq kardıologııalyq ortalyqta álemdegi eń myqty kardıohırýrgtyń biri Rımantas Benetıs pen ortalyq dırektory Almat Qudaspaev naýqastarǵa úsh ota jasady. Ota jańadan paıda bolǵan qolqa anevrızmasyna qatysty qolqa bóliminiń hırýrgııasy taqyrybyna arnalǵan sheberlik sabaǵynyń aıasynda ótti.
Rımantas Benetıs Kaýnas ýnıversıteti klınıkasynyń jetekshisi. Buǵan deıin Danııa, Shvetsııa, Anglııa men Belgııada jumys istegen. Sońǵy bes jylda Qazaqstannyń kardıohırýrgııa salasynda eńbek etip keledi.
Sondaı-aq Aqsaı balalar klınıkasynda Pýsan ulttyq ýnıversıteti gospıtaliniń professorlary Lı ıÝnsýb pen Park Vonsok ta sheberlik sabaǵyn ótkizdi. Ortopedııa salasynda patologııasy bar balalarǵa ota jasady.
«Professor Benetıs júrekke úsh ota jasady. Ota jasaýdaǵy ár qadamyn túsindirip otyrdy jáne rezıdentter men jas hırýrgtar úshin vıdeoǵa túsirildi. Al Pýsan ýnıversıtetiniń professorlary aımaqtan kelgen balalarǵa 5 tegin ota jasap, 15 balaǵa tegin dárigerlik keńes berdi», - dedi Asfendııarov atyndaǵy QazUMÝ-dyń rektory Talǵat Nurǵojın.
Qazaqstandaǵy ár besinshi dáriger - QazUMÝ-dyń túlegi. Ýnıversıtet túlekteriniń qatarynda 8 Densaýlyq saqtaý mınıstri, 14 depýtat jáne oblystyq densaýlyq saqtaý departamentiniń basshylary bar. Sonymen qatar ýnıversıtettiń 19 túlegi - Ǵylymı-zertteý ortalyǵynyń dırektorlary. Bıyldan bastap oqý ornynda Reseıdiń, Tájikstan, Qyrǵyzstan, Ózbekstan, Mońǵolııa, Iordanııa, AQSh, Iran men Túrkııanyń azamattary bilim alyp jatyr.
