Almatyda shetelden keden zańnamasy óreskel buzylyp ákelingen kólikter tárkilendi
«Kólikti tárkileý ákimshilik óndirýdiń bir túri bolyp tabylady. Eger jeke tulǵa kólikti shekara arqyly zańsyz engizgeni úshin ákimshilik kodekstiń 430 babynyń 1, 2 tarmaǵy boıynsha bir emes, birneshe ret ákimshilik jaýapkershilikke tartylsa, sot onyń kóligin tárkileý týraly sheshim shyǵara alady. Qazir Almatyda qyrǵyz memlekettik nómirli 4 avtokólik tárkilendi. Oǵan qosa kólik tasymaldaýshylarǵa atalǵan zańnama boıynsha 20 AEK esebinde aıyppul salynady», - dedi Kedendik baqylaý departamenti quqyqtyq qamsyzdandyrý bóliminiń basshysy Qojahmet Ysqaqov.
Qoldanystaǵy zańnama boıynsha ýaqytsha ákelingen kólikterdi paıdalanýǵa qatysty birqatar shekteýler qoıylǵan.
Atalǵan kólikterdi ózge tulǵalarǵa qoldanýǵa berýge bolmaıdy. Jeke tulǵalarǵa qoldanýǵa berý úshin kólikter kedendik rásimdeýden ótkizilýi kerek.
«Qazirgi tańda paıdalaný merzimi ótip ketse de, Almaty aımaǵynda júrgen sheteldik kólikterdiń ıeleri kedendik kodekste kórsetilgen merzimde - 30 kún aralyǵynda kedendik tólemder men salyqtardy tóleýi qajet. Eger, bulaı bolmasa, is kólik ótkizilgen keden organyna - Qordaıǵa jiberiledi. Olar óz kezeginde bereshekti tóleý jóninde habarlama joldaıdy. Júrgizýshi oǵan da jaýap bermese, is sotqa jiberiledi», - dedi postkedendik baqylaý organdary basqarmasynyń basshysy Sapargúl Medelhanova.
