Almatyda sheteldegi fýtýrıstik dendrarıı úlgisimen jańa nysan salynady
NUR-SULTAN. QazAqparat – Ótken jyldyń kókteminde ál-Farabı dańǵylyndaǵy «Suńqar» shańǵy tramplınderi kesheni aýdanynda aıryqsha dendrosaıabaq paıda bolatyny aıtylǵan. Almatynyń jasyl ekonomıka basqarmasy osy jobanyń júzege asý barysy týraly málimdedi, dep habarlaıdy QazAqparat tilshisi.
«Arboretýmyń jalpy aýdany 57 gektar bolýy kerek. Biz bul jobanyń jobalyq-smetalyq qujattamasyn ázirlep jatyrmyz. Ǵylymı mamandarmen birlese otyryp, sýarý júıesin jáne ınjenerlik jelilerdi júrgizý úshin kóshkin baýraıyna aǵash otyrǵyzý máselesin pysyqtap jatyrmyz. Joba shilde aıynda saraptamadan ótedi dep josparlap otyrmyz», - dedi basqarma basshysynyń orynbasary Ulan Abdýldaev.
Onyń aıtýynsha, ınvestorlar ál-Farabı arqyly ótetin jańa saıabaq aımaǵyn Botanıkalyq baqpen baılanystyratyn jaıaý júrginshiler kópiri jobasyn ázirlep jatyr. Bul joba da bıyl jazda saraptamadan ótedi.
Eske sala keteıik, 2021 jyldyń sáýir aıynda Jasyl ekonomıka basqarmasynyń basshysy Almatyda ál-Farabı tóbesindegi jańa saıabaq pen rekreatsııalyq aımaq - arboretým paıda bolatynyn aıtqan bolatyn. Ol Qytaı, Ulybrıtanııa jáne Avstralııadaǵy fýtýrıstik dendrarıı úlgisi boıynsha jobalanady.
Foto: Almaty q. ákimdigi
