Almatyda shetel azamatyn 45 myń teńgege aldaǵan taksı júrgizýshisi ustaldy
ALMATY. QazAqparat - Almatyda shetel azamatyn áýejaıdan qonaqúıge 45 myń teńgege aparǵan taksıst ustaldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, 18 sáýir kúni Almaty halyqaralyq áýejaıyndaǵy jelilik polıtsııa bólimine Lufthansa áýekompanııasynyń Frankfýrt – Almaty baǵytyndaǵy reısimen kelgen 43 jastaǵy Germanııa azamaty shaǵymdanǵan.
Ol ózin áýejaıdan qonaqúıge qasaqana joǵary baǵamen, ıaǵnı 45 myń teńgege jetkizgen taksı júrgizýshisine qatysty shara qoldanýdy suraǵan.
Kólik polıtseıleri jedel-izdestirý is-sharalaryn júrgizý barysynda taksı júrgizýshisin anyqtady. Ol Almatynyń 45 jastaǵy turǵyny bolyp shyqty. Er adam Germanııa azamatyna taksı qyzmetin usynyp, Almaty qalasynyń halyqaralyq áýejaıynan qaladaǵy Qonaev kóshesinde ornalasqan qonaqúıge aparǵany úshin joǵary tólem alǵan.
«Taksı júrgizýshisi keltirgen shyǵyndy ótedi. Quqyq buzýshy QR ÁQBtK-niń 449-babynyń 1-bóligi (Qoǵamdyq oryndarda tıisý) boıynsha ákimshilik jaýapqa tartyldy»,- dep habarlady vedomstvodan.
Germanııalyq azamat kólik polıtseılerine joǵary kásibılik tanytqany jáne qarajatyn keri qaıtaryp alýǵa úles qosqany úshin alǵys aıtty.
Eske sala keteıik, jyl basynan beri elimizdiń áýe jáne temirjol kóligi nysandarynda túrli ákimshilik quqyqbuzýshylyqtar úshin 15 970 azamat jaýapqa tartyldy. Onyń ishinde qoǵamdyq oryndarda tıiskeni úshin 880 azamat anyqtalǵan. Onyń 243-i – zańsyz taksı júrgizýshileri.
