Almatyda shet eldegi qandastarymyzdyń kitaptarynyń tusaýkeseri ótedi
ALMATY. 7 jeltoqsan. QazAqparat /Názıra Eleýhan/ - Almatyda jeltoqsannyń 8-i kúni Dúnıejúzi qazaqtary qaýymdastyǵynyń úıinde Baılanys jáne aqparat mınıstrligi Aqparat jáne muraǵat komıtetiniń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha shet eldegi qazaq jazýshylary kitaptarynyń resmı tusaýkeseri ótedi.
Tusaýkeserge Qytaı, Mońǵolııa, Batys Eýropa, Túrkııa, Reseı, Ózbekstan, Qaraqalpaqstan, Qyrǵyzstan memleketterindegi qazaq mádenı ortalyqtarynyń tóraǵalary, zııaly qaýym ókilderi, avtorlar men avtorlardyń týystary, Almaty qalasyndaǵy kitaphana qyzmetkerleri, Dúnıejúzi qazaqtary qaýymdastyǵy janyndaǵy «Óner» ortalyǵynyń ánshi-kúıshileri qatysady.
Bıyl Dúnıejúzi qazaqtary qaýymdastyǵynyń «Atajurt» baspa ortalyǵynan Tashkent topyraǵynda dúnıege kelip, eki eldiń ádebıetinen sýsyndaǵan, eki tilde birdeı jazatyn Mekembaı Omarulynyń «Tórtkúl dúnıe» óleńder jınaǵy, Anand Amardyń mońǵolııalyq ǵalym Hamaı Júkeldiń aýdarmasymen «Kóshpendilerdiń qysqa tarıhy», Qytaı elindegi belgili qazaq aqyny Orynǵazy Mámbazarulynyń «Ular» óleńder jınaǵy, Mońǵolııada turatyn ǵalym-jazýshy Ǵalymmurat Habsattarulynyń «Qazaq bolmysy» atty qazaqtyń tarıhy, tili, jeri týraly eńbegi, Qytaı elindegi jas qazaq aqyndarynyń «San ǵasyrlyq saǵynysh» óleńder jınaǵy, Mońǵolııada ómir súretin qandasymyz, talantty aqyn, zerdeli ǵalym Suraǵan Rahmettiń «Kógildir shabyt» atty jyr jınaǵy, ótken ǵasyrda Mońǵolııada ómir súrgen aqyn, jazýshy-dramatýrg Imashhan Baıbatyrulynyń «Qyzyltóbe» atty jyr jınaǵyna engen buryn jarııalanbaǵan úzdik óleńderi, ańyz dastandary men balladalary, qytaılyq talantty qalamger Kúngeı Muqajannyń «Orteke» atty áńgimeler men hıkaıattar jınaǵy jaryq kórdi.
"Atalmysh qalamger kitaptarynyń tusaýkeser rásimine, shetelde ómir súretin qazaq aqyn-jazýshylarynyń shyǵarmashylyǵyna qyzyǵýshylyq tanytqan barlyq oqyrman qaýymǵa esigimiz ashyq",-deıdi sharanyń uıymdastyrýshylary.
