Almatyda sheneýnik «Ońaı» kartasyn áleýmettik jelige tirkep qoıýǵa keńes berdi
ALMATY. QazAqparat - Almatyda Almaty jolaýshylar tasymaly kóligi jáne avtomobıl joldary basqarmasynyń basshysy Maqsut Isahov «Ońaı» kartasynan aqsham joǵaldy» dep dabyl qaqqandarǵa jaýap berdi, dep habarlaıdy QazAqparat tilshisi.
«Sońǵy ýaqytta «Ońaı» kartasynan aqsham joǵaldy» degen adamdar kóp bolyp ketti. Men ózim mynandaı málimdeme jasaǵym keledi. «Ońaı» kartasynan aqsha eshqaıda ketpeıdi. Tipti senimsizdik bolyp jatsa, «Ońaı» júıesiniń arnaıy saıtyna kirip jeke kabınet ashyp, ony telegram áleýmettik jelisine tirkep qoıýǵa keńes beremin», - dedi M.Isahov.
Basqarma basshysy «Almaty transport holdıngi» JShS arnaıy halyqqa qyzmet kórsetý ortalyǵyna kelip, kartadaǵy qarjynyń qalaı jumsalǵanyn anyqtap bilip ketýge bolatynyn aıtty.
Aıta ketý kerek, Almatyda búginnen bastap qoǵamdyq kólikterde saralanǵan tarıf engizildi. Jolaýshylar «OŃAI» kartasy nemese SMS jáne bank kartalary arqyly - 80 teńge, al qolma-qol aqsha bolsa 150 teńge tóleýi tıis.
Tek metrodaǵy tólemder ǵana ózgerissiz qaldy.
Búgin qalalyq ákimdiktiń ókilderi arnaıy reıd uıymdastyrdy. Reıd nátıjesine sáıkes, túski 14:00-de 23 mln teńge jınaldy.
«Al saralanǵan tarıf engizilmeı turyp ótken seısenbide kúni boıy 26 mln teńge jınalǵan edi. Qoǵamdyq kólikti paıdalanǵan jolaýshylardyń sany 28 paıyzǵa ósti. ıAǵnı, 28 paıyz adamdar kóleńkeden shyqty. Keshke deıin eki ese kóp aqsha jınaýdy kózdep otyrmyz», - dedi Maqsut Isahov.
«Almaty transport holdıngi» JShS keshe ǵana tasymaldaýshylarǵa 25 000 karta taratsa, búgin taǵy qosymsha 5 myń kartaǵa tapsyrys túsip otyr.
