Almatyda shekteý sharalary mindetti túrde qabyldanady - Saǵyntaev

NUR-SULTAN. QazAqparat – Almaty ákimi Baqytjan Saǵyntaev qalada koronavırýstyń úndi shtamynyń tirkelýimen shekteý sharalary kúsheıtiletinin aıtty, dep habarlaıdy QazAqparat tilshisi.

«Lokdaýn bola qoımaıtyn shyǵar. Biraq shekteý sharalary mindetti túrde qabyldanady. Qalalyq departament qazir qaýly jobasyn daıyndap jatyr. Sanıtarııalyq-epıdemıologııalyq qyzmet komıtetiniń sheshimin kútip otyrmyz. Komıtettiń qaýlysy shyqqannan keıin qalalyq departamenttiń qaýlysy da jarııalanady. Іndet jyldam tarap jatqanyn kórip otyrmyz. Sondyqtan bári túsinistikpen qaraıdy dep oılaımyn. Bul jerde birinshi kezekte vaktsınalaýdy kúsheıtý kerek. Basqa amaly joq. Almatylyqtardy, búkil qazaqstandyqtardy ekpeni belsendi alýǵa shaqyramyz», - dedi Baqytjan Saǵyntaev Ortalyq kommýnıkatsııalar qyzmetinde.

Buǵan deıin B.Saǵyntaev qala jaqyn kúnderi qaıtadan «qyzyl» aımaqqa ótýi múmkin ekenin aıtqan bolatyn.

«Josparly túrde qabyldanatyn naýqastardy qabyldaý qazir toqtatyldy. Bir apta boıynda baqylaımyz. Eger osylaı jalǵasa beretin bolsa, onda bizdiń jobamyz boıynsha qazir «sary» aımaqta tursaq, qyzyl aımaqqa ótý qaýpimiz bar. Úndistandyq shtamm soǵan alyp kele jatyr», - dedi Baqytjan Saǵyntaev.