Almatyda shegirtkege qarsy dárileý sharalary júrgizilip jatyr
ALMATY. QazAqparat - Almatyda shegirtkege qarsy dárileý sharalary júrgizilip jatyr, dep habarlaıdy QazAqparat tilshisi.
Almaty qalasynyń kásipkerlik jáne ınvestıtsııalar basqarmasy 1-4 shilde aralyǵynda jasyl jelekterdi qorǵaý maqsatynda Almaty qalasynyń Naýryzbaı, Alataý, Jetisý, Túrksib jáne Medeý aýdandarynda shegirtkege qarsy kúres jumystaryn júrgizýde.
Zalalsyzdandyrý jasyl jelekterdi zııankesterden qorǵaýǵa jáne jándikterdiń Almaty aýmaǵyna kelýine tosqaýyl qoıý úshin qolǵa alyndy.
Bul jumystar túngi ýaqytta, saǵat 23:00-den 05:30-ǵa deıin júrgiziledi. Qala aýmaǵyna shegirtkelerdiń kelýine áser etetin jerlerde (bos jerler, jyralar, adamdar turmaıtyn bos ýchaskeler) jasalady.
Qoldanylatyn preparattar QR aýmaǵynda paıdalanýǵa ruqsat etilgen jáne turǵyndarǵa, janýarlar men qustarǵa zııany joq.
Zalalsyzdandyrý jumystary júrgizilgen aımaqtar sıgnaldy jalaýshalarmen jáne taqtaıshalarmen belgilenedi. Almaty qalasynyń kásipkerlik jáne ınvestıtsııalar basqarmasy qala turǵyndary men qonaqtaryna belgi qoıylǵan jerlerge barmaýlaryn ótinedi.
