Almatyda «Sheberler qalasy» jármeńke-kórmesi ótip jatyr

Ony «Our Heritage»qoǵamdyq qory qalalyq ákimdikpen birlesip uıymdastyryp otyr. Keshe bastalǵan bul shara 3 kúnge sozylmaq. Maqsat - qolónershilerdi dástúrli tehnıkalar men materıaldardy qoldanýǵa yntalandyrý, aımaqtaǵy mádenı áralýandyqty saqtaý jáne halyq sheberleriniń jetistigin jalpy jurtshylyqqa tanystyrý. «Sheberler qalasy» baǵdarlamasyna sheberlik-dáristerin ótkizý men Qazaqstan, Qyrǵyzstan jáne Ózbekstannyń qolóner buıymdarynyń jármeńkesi enip otyr.

«Jármeńkege Qazaqstan men Qyrǵyzstannan 20-ǵa jýyq qolónershi qatysyp jatyr. Kıiz basýdan qazir elimizde óz ultymyzdyń arasynda sanaýly ǵana sheber bar. Ókinishke qaraı, ony úırenýge óz qandastarymyzǵa qaraǵanda ózge ult ókilderi erekshe qyzyǵýshylyq bildirýde. Sonyń nátıjesinde qazaqtyń kıizden jasalatyn sándik jáne kádelik buıymdary boıynsha qazir olardyń shyǵarǵandary basym bolyp otyr», - deıdi «Balataı» qoǵamdyq birlestiginiń tóraıymy Kúlán Janǵutty. Onyń aıtýynsha, aldaǵy aıda mundaı jármeńke endi Astana qalasynda da ótpek.

Sheberlik dáristeri qazaqtyń halyqtyq 13 qolóner túri boıynsha ótýde. Onda kıiz boıynsha qazaqstandyq «Sheber» baıqaýynyń jeńimpazy Kúlán Janǵutty, qazaqtyń dástúrli kestesinen «Biz keste» boıynsha BUU-nyń bilim, ǵylym jáne mádenıet jónindegi uıymy (ıÝNESKO) baıqaýynyń jeńimpazy Zeınelhan Muhamedjan, keremıkadan qyshshy Abaı Rysbaev pen Marat Sársenbaev, zergerlik ónerden ıÝNESKO jáne «Sheber» baıqaýlarynyń jeńimpazdary Aman Muqajanov pen Serjan Bashırov jáne Qalmyrza Tasov, aǵash oıýdan Nagı Imanbaev, qaıys toqýdan Seıfýlla Rystan óz sheberliginiń qyr-syrymen bólisýde.