Almatyda sharshy metri - 950, Astanada 750 AQSh dollaryn quraıtyn turǵyn úımen qamtamasyz etýdiń jańa kestesi ázirlendi
ASTANA. Shildeniń 14-i. QazAqparat /Rýslan Ǵabbasov/ - Qazaqstan azamattaryn turǵyn úımen qamtamasyz etýdiń jańa júıesi ázirlendi.
Bul týraly búgin Astanada Qurylys isteri jáne turǵyn úı-kommýnaldyq sharýashylyq agenttiginiń tóraǵasy Serik Nokın málim etti.
«Memlekettik baǵdarlama boıynsha qoljetimdi turǵyn úı, ıaǵnı sharshy metri 56 myń 515 teńgeni quraıtyn páterler bıýdjettik uıymdardyń qyzmetkerlerine, 29 jasqa deıingi jas otbasylarǵa bólinedi. Árıne, osy memlekettik baǵdarlamamen páter alýǵa nıet bildirgenderdiń sany osy maqsatqa bólingen qarjydan asyp túsedi»,- dedi S. Nokın.
Agenttik basshysynyń sózine qaraǵanda, atalǵan úılerdi alýǵa shamamen 82 myń ótinim jasalǵan. Onyń ishinde 32 myńǵa jýyǵy ózderiniń múmkindikterin rastady. «Astana men Almaty óte qarqyndy ósip keledi. Osyǵan baılanysty qurylys jumystaryn iske asyrýǵa úlgermeı jatyr», - dedi ol.
«Turǵyn úı qurylys jınaq banki» men agenttik turǵyn úımen qamtamasyz etý turǵysynda jańadan taǵy bir júıeni ázirlegenine toqtalǵan S. Nokın, «biz qymbat emes turǵyn úıdiń qurylysyn bastaǵymyz keledi. Qazir kezde osy úılerdi salý boıynsha «Turǵyn úı qurylys jınaq bankin» qoldaý turǵysynda Úkimette tıisti qarjy qarastyrylýda», dedi.
Agenttik basshysy osy qurylystar boıynsha ár sharshy metrdiń baǵasy anyqtalǵanyn jetkizdi. «Almatydaǵy úılerdiń sharshy metri - 950, sondaı-aq Astana men Aqtaýda shamamen 750 dollar kóleminde bolyp otyr. Al basqa da oblys ortalyqtarynda sharshy metri 600 dollar shamasynda», - dedi ol.
Bul júıe boıynsha barlyq tetikter zerdelenip shyqqan.
