Almatyda «Shańyraq» baǵdarlamasy boıynsha 99 sertıfıkat maquldandy
ALMATY. QazAqparat- Almaty qalasy «Otbasy bank» AQ fılıaly dırektorynyń orynbasary Danagúl Túsipova onlaın brıfıng barysynda tabysy tómen otbasylar úshin qalada turǵyn úı sertıfıkattaryn berý baǵdarlamasynyń iske asyrylýy týraly aıtyp berdi, dep habarlaıdy QazAqparat tilshisi.
Danagúl Túsipovanyń aıtýynsha, turǵyn úı sertıfıkaty ıpotekalyq nesıe boıynsha bastapqy jarnanyń bir bóligin jabý úshin beriledi.
«Ony tabysy aıyna eń tómengi kúnkóris deńgeıiniń 3,1 eselik kórsetkishinen aspaıtyn ótinish berýshiler alady. 2021 jyly eń tómengi kúnkóris deńgeıi 34 302 teńgeni quraıdy. Áleýmettik kómek qaıtarymsyz negizde kórsetiledi. Mysaly, otbasynda 6 adam turatyn bolsa, onda árbir otbasy múshesiniń tabysy 106 myń teńgeden aspaýy tıis», – dep túsindirdi «Otbasy bankiniń» ókili.
Sondaı-aq spıker turǵyn úı sertıfıkatyn berý tártibi týraly aıtty.
Máselen, turǵyn úıdi bank klıenti ákimdikte kezekte turǵan óńirde ǵana satyp ala alady. Turǵyn úı sertıfıkatyn alýǵa ótinimderdi qabyldaý Almatyda 2 shildeden bastalady. Ony birinshi kezekte ótinish bergen alǵashqy 2 myń adam alady.
«Almatyda «Shańyraq» baǵdarlamasy boıynsha kezekte turǵan 99 azamatqa tórt sanat boıynsha turǵyn úı sertıfıkatyn alý ruqsat etildi. «Baqytty otbasy» baǵdarlamasy boıynsha 183 sertıfıkat maquldandy. Aqsha kezekte turǵan adamnyń «Otbasy banktegi» shotyna aýdarylady», – dedi Danagúl Túsipova.
Aıta keterligi, Qazaqstanda «Shańyraq» baǵdarlamasy turaqty túrde, al «Baqytty otbasy» baǵdarlamasy ýaqytsha jumys isteıdi. Ony iske asyrýǵa respýblıka boıynsha tek 70 mlrd teńge bólindi.
«Otbasy bankiniń» ókili turǵyn úı satyp alýǵa bastapqy jarnasy joq qazaqstandyqtarǵa óz bankterinde shottar ashýdy jáne bastapqy jarnaǵa azdap aqsha jınaqtaýdy usyndy. «Otbasy banktegi» jınaqtardyń artyqshylyǵyna memlekettik syıaqy, sondaı-aq jeńildetilgen sharttar kiredi.
