Almatyda shańǵy sportynan álem chempıonattary ótedi
ALMATY. QazAqparat - Almatyda 2015 jyldyń 1-8 aqpany aralyǵynda «Suńqar» Halyqaralyq shańǵy tramplınderi kesheninde jasóspirimder jáne 23 jasqa deıingiler arasynda shańǵy jarystarynan álem chempıonattary ótedi.
Jasóspirimder arasynda ótetin álem chempıonatynyń baǵdarlamasyna shańǵy sportynyń shańǵy jarystary, tramplınnen sekirý jáne shańǵy qossaıysy syndy túrleri engen. Olarǵa qatysatyn jasóspirimder 23 jasqa deıingiler arasynda ótetin álem chempıonatyna qatysa almaıdy.
«Almaty qalasynyń Halyqaralyq sport jobalary dırektsııasy» Memlekettik qory baspasóz qyzmetiniń habarlaýynsha, qazirgi tańda 36 elden 500-den astam shańǵyshy chempıonatqa qatysatyndaryn qýattaǵan. Atalmysh jarystarda Qazaqstan qurama komandasy sapynda 26 shańǵyshy el namysyn qorǵaıtyn bolady.
Aıta ketelik, bul chempıonattar Almatyda tuńǵysh ret ótkizilmek. Uıymdastyrýshylardyń atap ótkenindeı, mundaı halyqaralyq deńgeıdegi sporttyq sharalardy ótkizý - jastardy qysqy sport túrlerimen aınalysýǵa kóptep tartýǵa septigin tıgizedi. Sonymen qatar, olar Almatyda 2017 jyly ótetin Búkilálemdik qysqy Ýnıversıada oıyndaryna daıyndalýda mańyzdy qadam bolmaq.
Bul sharalardy Almaty qalasynyń ákimdigi, Almaty qalasynyń halyqaralyq sport jobalary dırektsııasy, Qazaqstannyń shańǵy sporty túrleri boıynsha qaýymdastyǵy, sondaı-aq, Qazaqstannyń shańǵymen taramplınnen sekirý jáne Qazaqstan Respýblıkasynyń shańǵy jarystary Ulttyq Federatsııalary uıymdastyrǵaly otyr.
