Almatyda shańǵy sportynan Álem birinshiligi aıaqtaldy
ALMATY. QazAqparat - Almatyda «Suńqar» Halyqaralyq shańǵy tramplınderi kesheninde jasóspirimder arasynda (17 jasqa deıin) shańǵy sportynyń soltústik túrleri jáne jastar arasynda (23 jasqa deıin) shańǵy jarystary boıynsha Álem chempıonaty aıaqtaldy.
Halyqaralyq shańǵy sporty federatsııasy iri halyqaralyq jarystyń joǵary deńgeıde ótkenin málimdedi.
Birinshilikte Norvegııa qurama komandasy 10 altyn, 4 kúmis jáne 4 qola medaldi jeńip alyp, birinshi oryndy ıelendi. Ekinshi oryn tuǵyryna Reseı quramasy kóterildi. Olardyń qorjynynda 4 altyn, 8 kúmis jáne 6 qola medal bar. Al Germanııa qurama komandasy 5 altyn, 5 kúmis jáne 2 qola medalmen úshinshi orynǵa turaqtady.
Chempıonat barysynda jalpy komandalyq esepte Norvegııa quramasy kóshbasynda júrip otyrdy.
«Shańǵy jarysy - Norvegııada nómiri birinshi sport. Fýtboldan da tanymal. Shańǵy jarysyn - bizdiń ulttyq sportymyz deýge bolady. Sondyqtan da norvegııalyq sportshylar álemdik jarystarǵa qashanda qýana qatysady», - dedi óz sózinde Norvegııa qurama komandasynyń bas jattyqtyrýshysy Brıt Baldıshol. Degenmen, germanııalyq shańǵyshy Vıktorııa Karl birinshiliktiń basty qaharmanyna aınaldy. Ol óz komandasynyń qorjynyna sprınterlik qashyqtyqta jáne 5 shaqyrym jeke jarysta eki altyn jáne skıatlonnan 10 shaqyrymdyq jarysta bir kúmis medal saldy.
Al Qazaqstan quramasyna keler bolsaq, jastar arasynda ótken 15 shaqyrymdyq shańǵy jarysynda Rınata Mýhına alǵashqy ondyqqa ilindi. Bul - biz úshin úzdik nátıje. Halyqaralyq shańǵy sporty federatsııasynyń ókilderi jarystardyń uıymdastyrý deńgeıin joǵary baǵalady.
«Uıymdastyrýshylar qulshyna jumys istpedi. Ózderine tıesili mindetterdi jedel atqarýǵa tyrysty. Jaraqtandyrý jaqsy deńgeıde. Kıim aýystyratyn bólmeler, sportshylardy jaıǵastyrý, ashana - barlyǵy normaǵa saı boldy» - dedi Halyqaralyq shańǵy sporty federatsııasynyń úılestirýshisi Tonı Gýgemos.
