Almatyda «Shámshi» jýrnalynyń 1 jyldyǵyna arnalǵan kontsert ótedi
ALMATY. Jeltoqsannyń 24-i. QazAqparat /Erlik Erjanuly/ - Almatyda jeltoqsannyń 29-y kúni «Shámshi» jýrnalynyń 1 jyldyǵyna oraı Shámshi Qaldaıaqov ánderiniń keshi ótedi,
dep habarlaıdy QazAqparat.
Kózi tirisinde-aq, «qazaq valsiniń koroli» atanyp, halqynyń yqylas-peıiline bólengen birtýar sazgerdiń dúnıeden ozǵanyna 17 jyldyń júzi boldy. Sodan beri kompozıtordyń esimin ulyqtaýda birshama ister atqarylǵanymen, júıeli túrde jumys júrgizilmedi. Osy olqylyqtyń ornyn toltyrýdy Shámshi Qaldaıaqov atyndaǵy halyqaralyq án festıvali dırektsııasynyń quryltaıshylyǵymen jaryq kórip jatqan «Shámshi» ulttyq mádenıet jáne ǵylymı-tanymdyq jýrnaly óz qolyna alyp otyr. Qazirge deıin basylymynyń 12 nómiri jaryq kórdi. Onda Shámshi Qaldaıaqovqa qatysty barlyq materıaldar - «Sol bir kez esimde...», «Sarǵaıǵan sýretter syry», «Shámshiniń áni», «Amanat», «Kózkórgen», «Án-aǵa» dep atalatyn aıdarlar boıynsha jarııalanyp kele jatyr. Shámshi esimimen atalatyn jýrnal memlekettik rámizderdi nasıhattap, jastarymyzdy patrıottyq rýhta tárbıeleýge jáne olardyń boıyna otansúıgishtik dánin seýip, rýhanı baılyǵyn arttyrý jolynda da talmaı eńbek etip keledi. Onda sondaı-aq, ekonomıkalyq, saıası saraptamalar, tarıhı-tanymdyq materıaldar, batyl boljamdar men jastar máselesi, ulttyq patrıotızm men salaýatty ómir salty, til men dilge qatysty ózge de máseleler basty nazarǵa alynǵan.
