Almatyda Shámshi Qaldaıaqovtyń 90 jyldyǵyna arnalǵan án keshi ótti
ALMATY. QazAqparat – Abaı atyndaǵy Qazaq memlekettik akademııalyq opera jáne balet teatrynda «qazaq valsiniń koroli» Shámshi Qaldaıaqovtyń 90 jyldyǵyna arnalǵan «Shámshi álemi» atty kontsert ótti, dep habarlaıdy QazAqparat tilshisi.
Kontsert Abaı atyndaǵy memlekettik opera jáne balet teatrynyń sımfonııalyq orkestriniń súıemeldeýimen ótti. Dırıjer - kompozıtordyń uly Muhtar Qaldaıaqov boldy.
«Men óte baqyttymyn. Búgin men 15 jasar bala kezimdi esime túsirdim. Ákemniń 50 jasyna arnalǵan kontsertti osy teatrdyń amfıteatrynda tamashalaǵanmyn. Mine, odan beri 40 jyl ótipti. Al osy óner ordasyna dırıjer bolyp kelgenime – 25 jyl. Búgin meniń balalarym sahnada óner kórsetti, óte qýanyshtymyn. Án keshine keler bolsam, biz baǵdarlama boıynsha Almaty qalasy ákiminiń estradalyq-sımfonııalyq orkestriniń jetekshisi, QR Eńbek sińirgen óner qaıratkeri Aleksandr Belıakovpen jáne belgili kompozıtor Rınat Ǵaısınmen jumys istedik», - deıdi Muhtar Qaldaıaqov.
Kórermen 50-60 jyldardaǵy Almatynyń retro atmosferasyna kýá boldy. Abaı atyndaǵy memlekettik opera jáne balet teatrynyń úzdik solısteri kompozıtordyń jıyrmadan astam ánin oryndady. Atap aıtqanda «Ánim sen ediń», «Keshikpeı kelem dep en», «Aq bantık», «Qaıdasyń», «Baqyt qushaǵynda», «Meniń Qazaqstanym» jáne basqa ánder.
Abaı atyndaǵy memlekettik akademııalyq opera jáne balet teatrynyń solısi Gúlzat Daýrbaeva stýdenttik shaǵynda Shámshi Qaldaıaqov atyndaǵy án festıvaliniń laýreaty bolǵanyn aıtty.
«Búgin men Shámshi aǵanyń eki ánin oryndadym. Kompozıtor murasy árqaısymyzdyń júregimizde. Stýdent kezimde maǵan Shámshi aǵany kórý baqyty buıyrdy. Ol kisi maǵan batasyn bergen. Kompozıtordyń 90 jyldyǵyna arnalǵan kontsertte halyqtyń júreginen máńgilik oryn alǵan ánder shyrqaldy. Onyń artynda talantty urpaq qalǵanyna qýanyshtymyn «, - deıdi ánshi.
Eske salaıyq, 15 tamyzda «qazaq valsiniń koroli» Shámshi Qaldaıaqovtyń týǵanyna 90 jyl toldy. Aty ańyzǵa aınalǵan sazgerdiń uly ákesi týraly syr shertken bolatyn.
Aıta keteıik, kontsertte barlyq sanıtarlyq talaptar saqtaldy.
