Almatyda shalǵaı aýdandardan ortalyqqa jańa avtobýs baǵyty ashyldy
ALMATY. QazAqparat - Búgin Almatyda jańa eki jańa baǵyttaǵy №46 jáne №122 avtobýstary jolǵa shyqty, dep habarlaıdy QazAqparat tilshisi.
Qalalyq ákimdiktiń habarlaýynsha, bul baǵyt kólik reformasyn jáne qoǵamdyq kólik júıesin turaqtandyrý aıasynda atqarylyp jatqan jumystyń nátıjesi bolyp tabylady.
Jańa baǵyt Jetisý aýdany turǵyndarynyń ótinishi boıynsha ashyldy. № 46 baǵyt Pervomaıka yqsham aýdanyn - Ámbebap bazardy - Qulager eldi mekenin - Jetisý aýdandyq ákimdigin - Belınskıı kóshesi arqyly «Almaty-1» temirjol vokzalyna deıin barady. Bul baǵyt boıynsha 10 avtobýs qyzmet kórsetedi, ár avtobýstyń ıntervaly 10 mınýt. Táýligine 3000 jolaýshy qymetti paıdalanatyn bolady.
Alataý aýdanyndaǵy Rahat jáne Mádenıet eldi mekenderi turǵyndaryn kólikpen qamtý úshin buryn bir ǵana avtobýs qatynaıtyn №122 baǵytyna ózgeris engizildi. Endi marshrýt Rahat, Mádenıet yqsham aýdandary - №196 mektep - M.Shoqaı kóshesi - Ortalyq - ÚAK- Saıaly - HQKO avto - Aqyn Sara kóshesi - B.Momyshuly kóshesi - Ýnıversıada kóshesi - Alataý aýdany, HQKO arqyly júretin bolady. Búginnen bastap bul baǵyt boıynsha 20 mınýt ıntervalmen bes avtobýs jolǵa shyqty.
Eske salsaq, buryndary Almatyda kólikti reformalaý aıasynda №22, 70, 86, 65, 103, 50, 126, 112 baǵyttary boıynsha jańa avtobýstar jolǵa shyǵyp, №77 baǵyt qaıta jańaryp, №201 magıstraldy baǵyt ashylǵan edi.
Jalpy, Almatyda bıyl syıymdylyǵy ártúrli 388 avtobýs alynǵan bolatyn, olardyń 210- y jolda júr, 180 jańa avtobýs aqpan aıynyń sońyna deıin kezeń-kezeńimen baǵyttarǵa shyǵady. Jeke tasymaldaýshylar da 254 jańa avtobýs satyp aldy, olardyń 91 - i qala joldarynda qyzmet kórsetip júr.
