Almatyda shala týǵan shaqalaqtardyń 98 paıyzy aman qalady
ALMATY. QazAqparat - Almatyda eriktiler uıymy Halyqaralyq shala týǵan náresteler kúni qarsańynda shaqalaqtarǵa jyly kıim toqyp berdi, dep habarlaıdy QazAqparat tilshisi.
Jyl saıyn elimizde týylǵan balalardyń 10-12%-ǵa jýyǵy dúnıege merziminen buryn keledi. Olardy kútip-baǵý ata-anasy men dárigerlerge júkteledi. Sábıler alǵashqy 2-3 aıda densaýlyǵy men salmaǵyna baılanysty aýrýhanada bolady. Nárestelerdiń terisi tolyǵymen damymaǵandyqtan, kóbinese shaqalaqtar tońǵaq keledi.
«Nıtı dobra» klýbynyń eriktileri shala týǵan balalarǵa arnap 70 arnaıy toqyma kıim toqyp berdi. Kıimder jas analarǵa qalalyq perınataldyq ortalyqta jáne perınatologııa jáne balalar kardıohırýrgııa ortalyǵynda tapsyryldy. Aktsııa «AıALA» qaıyrymdylyq qorynyń qoldaýymen ótkizildi.
Atap aıtqanda, sábılerge shulyq, keýdeshe, bas kıim, jyly oramal jáne alǵashqy oıynshyqtary - segizaıaq berildi. Búgin ortalyqqa kezinde aı-kúni jetpeı týǵan balalar da keldi. Qazir olar ósip, balabaqshalarǵa jáne mektepterge baryp júr.
«Medıtsına - óte kúrdeli ǵylym. Keı jaǵdaıda jańa týǵan náresteniń dene qyzýyn tómendetý qajet, al keıde bala tońbaýǵa tıis. «AıALA» qory bizdiń neonatologtarmen, sheteldik professorlarmen yntymaqtastyqta problemany sheshýge keshendi qaraýǵa tyrysady. «Nıtı dobra» - erikti joba, ol bizdiń qorymyzdyń tujyrymdamasy - Qazaqstanda qaıyrymdylyq mádenıetin jáne dástúrin damytý isine tolyǵymen sáıkes keledi», - dedi «AıALA» qaıyrymdylyq qorynyń prezıdenti Aıdan Súleımenova.
«Búginde bizdiń ortalyqta bosanǵan áıelderdiń 10 paıyzy merziminen buryn týady. Nárestelerdiń 98-99%-y aman qalady. Orta eseppen alǵanda 800-1000 shala týǵan balanyń 750- 950 ósip ketedi. 2000 jyldardyń basynda 50% ǵana aman qalatyn. Búginde statıstıka eki esege jaqsardy», - dedi ortalyqtyń jansaqtaý bóliminiń meńgerýshisi Aınurym Sarbas.
«AıALA» qory «Tynys al, balaqaı» jobasynyń sheńberinde 2009 - 2016 jyldar aralyǵynda perınataldyq ortalyǵy men Almaty qalasyndaǵy perınatologııa jáne pedıatrııalyq kardıohırýrgııa ortalyǵynyń balalar jan saqtaý bólimshelerine quny 100,2 mln. teńge bolatyn zamanaýı medıtsınalyq apparatýra syıǵa tartqan bolatyn. Bul medıtsınalyq jabdyq Almaty qalasyndaǵy náresteler óliminiń deńgeıin tómendetýge kómektesti.
