Almatyda «Sháken juldyzdary» kınofestıvali bastaldy
ALMATY. 31 mamyr. QazAqparat - Almatyda Ortalyq Azııadaǵy jas kınematografısterdiń birden-bir halyqaralyq baıqaýy sanalatyn HІ «Sháken juldyzdary» Almaty halyqaralyq kınofestıvali bastaldy.
Bul sharany qala ákimdigi men «Sháken juldyzdary» prodıýserlik ortalyǵy birlesip uıymdastyryp otyr. Ol 4 maýsymǵa deıin sozylmaq.
Qazylar alqasynyń múshesi Sh. Aımanov atyndaǵy «Qazaqfılm» AQ-nyń bas redaktory Dıdar Amantaıdyń aıtýynsha, bıyl 32 elden myńǵa jýyq ótinish kelip túsken kórinedi. Olardyń arasynan iriktelip alynǵan 55 týyndy 4 sektsııada kórsetiletin bolady. Onyń tórteýi «Debıýtter», on jetisi «Jastar kınosy», jıyrma tórti «Stýdenttik kıno», segizi «Anımatsııa» sektsııasy boıynsha kórermender nazaryna usynylady. Al úndistandyq Ashvın Kýmardyń «Orman», reseılik Sergeı Mıroshnıchenkonyń «Rojdennye v SSSR, 21 god» fılmderi men Vladımır Hotıenkonyń kórkemdik jetekshiligindegi «Astra, men seni súıemin» jobasyndaǵy 9 fılm baıqaýdan tys kórsetilgeli otyr. Sondaı-aq taqyryptyq kórsetilimge «Aýǵanstannyń jastar kınosy»; Tsıýrıh óner ýnıversıteti kıno mektebiniń baǵdarlamasy; Sankt-Peterbor derekti fılmder stýdııasynyń 80 jyldyǵyna arnalǵan arnaıy baǵdarlama; Stsenarıster men rejısserlerdiń joǵary kýrsynyń 50 jyldyǵyna arnalǵan kórsetilimdik baǵdarlama; «Shar» stýdııa-mektebiniń 20 jyldyǵyna arnalǵan baǵdarlama enip otyr.
