Almatyda Sháken Aımanovtyń músini ornatyldy
NUR-SULTAN. QazAqparat - Almatyda qazaq rejısseri Sháken Aımanovtyń músini ornatyldy, dep habarlaıdy QazAqparat tilshisi.
Músin qoladan soǵylǵan. Avtory - músinshi Nurlan Dalbaı. Demeýshilikti belgili metsenat Nurlan Smaǵulov kórsetip otyr.
«Dál osy jerde - «Almaty» qonaq úıi mańynda Sháken Aımanovtyń eń kórneki kartınalarynyń biri - «Taqııaly perishte» fılmi túsirilgen bolatyn. Sháken Aımanov tiri kezinde osy jerde jumys kúnin ótkizgen. Músin ornatylǵan aýmaq almatylyqtardyń jáne shahar meımandarynyń súıikti ornyna aınalar degen úmittemin. Sháken Aımanov músininiń paıda bolýy - tarıhı oqıǵa desek te bolady», - deıdi Almaty qalasynyń ákimi Baýyrjan Baıbek.
Músinniń ashylý saltanatyna belgili óner qaıratkerleri Asanáli Áshimov, Bıbigúl Tólegenovalar qatysty.
«Men búgin Sháken Aımanovqa kórsetilip jatqan qurmetke qatty qýanyp turmyn. Sháken Aımanov uly adam edi. Ǵumyry qysqa bolsa da, jarqyn boldy. Biz ultymyzdyń osyndaı tulǵalaryn umytpaýymyz kerek. Dál osyndaı eskertkishter kóptep boı kóterip jatsa, nur ústine nur bolar edi», - deıdi Asanáli Áshimov.
Sháken Aımanov - qazaqtyń áıgili akteri ári rejısser. 1964 jyldan KSRO halyq ártisi. Týyp-ósken jeri - Pavlodar oblysynyń Baıanaýyl aýdany. Aımanov Qazaqstan Kınematografıster odaǵyn uıymdastyrýǵa qatysyp, odaq basqarmasynyń 1-hatshysy (1958 - 70) qyzmetin atqardy. KSRO Memlekettik syılyǵynyń (1952) jáne Qazaq KSR Memlekettik syılyǵynyń (1968) laýreaty. 1970 jyly 24 jeltoqsanda Máskeý qalasynda jol apatynan qaıǵyly qazaǵa ushyrady.
