Almatyda Sháken Aımanovqa eskertkish ornatyldy
ALMATY. QazAqparat - Almatyda belgili kınorejısser Sháken Aımanovqa eskertkish ornatyldy, dep habarlaıdy QazAqparat «Habar 24» telearnasyna silteme jasap.
«Bul - «Taqııaly perishte», «Bizdiń súıikti dáriger», «Atamannyń aqyry» syndy súbeli týyndylardy dúnıege ákelgen sanqyrly talantqa kórsetilgen qurmet. Músinniń Almaty qonaqúıiniń aldyna ornatylýynyń óz sebebi bar. Kınorejısserdiń ataqty «Taqııaly perishte» fılminiń negizgi kadrlary osy jerde túsirilgen. Endi keıingi urpaq dara tulǵany eske alyp, onyń músininiń janynda sýretke túse alady», - delingen aqparatta.
Shyǵarmashyl jannyń búkil bolmysyn ashqan músinniń avtory Nurlan Dalbaı.
Saltanatty sharaǵa jınalǵan óner maıtalmandary Sháken Aımanov jaıly estelikterimen bólisti.
«Planetalyq adam bar bolsa - bul naǵyz Shákeń. Moskvada birinshi búkilálemdik kınofestıvalde júrgizýshi bıdi habarlap, býgı-výgı dep aıtty. Jańa shyqqan kezi edi. Shákeń sony Elızabet Teılormen bılep, birinshi oryn alǵanyna kýágermin», - dedi Qazaqstannyń Eńbek Eri, akter Asanáli Áshimov.
