Almatyda «Shákárim» qoıylymynyń tusaýkeseri ótti
ALMATY. 1 jeltoqsan. QazAqparat - Almatydaǵy Muhtar Áýezov atyndaǵy Qazaq memlekettik akademııalyq drama teatrynyń repertýary «Shákárim» drama-dıalogymen tolyqty.
Onyń qoıýshy-rejısseri - QR eńbek sińirgen qaıratkeri Á. Rahımov, qoıýshy-sýretshisi - M. Saparov, kompozıtory - B. Dáldenbaı.
Qoıylymda basty rólderdi QR eńbek sińirgen qaıratkerleri B. Turys (Shákárim), A.Seıitmetov (Qarasartov) jáne T.Saǵyntaev (Halıtov), N.Ábilov (Áýpish), R.Seńkebaev (Mataqov) sııaqty ózge de akterlar somdaıdy.
Onda Shákárim - «Adam qolymen jasalatyn alapat apat kele jatqandaı», dep qazaqtyń basyna tónip kele jatqan qaýipti erte sezip-bilip otyrady. Bolshevıkterdiń qanquıly saıasatyn kórip-bilip otyrsa da «aqıqatty aıtqan adamǵa ólim qaýipti emes» dep qara basynyń qamyn kúıttep jaıly oryn izdep, elden bezýden bas tartyp, ólimdi qasqaıyp qarsy alady. NKVD tergeýshileri de stalındik qyrǵynnyń joǵarydan túsken nusqaý boıynsha júzege asqanyn moıyndap, bir-birine «meniń mindetim áshkereleý, seniń mindetiń moıyndatý» deıdi. Olar ótirik jalamen eldiń kókiregi oıaý, kózi ashyq azamattaryn qara basynyń qamy úshin qýǵyn-súrginge túsirip, zorlyq-zombylyq kórsetkenin «partııanyń saıasatymen» aqtaýǵa tyrysady.
