Almatyda shahmattan Azııa chempıonatynyń jeńimpazdary anyqtaldy
Qazaqstandyq shahmat federatsııasy habarlaǵandaı, jarystyń qorytyndysy boıynsha ózbekstandyq grossmeıster Shamsıddın Vohıdov «Azııanyń shahmat koroli» atandy (FIDE reıtıngi 2583, eń joǵary - 7 ball jınady).
Irandyq grossmeıster Bardııa Daneshvar kúmis medal ıegeri atandy (FIDE reıtıngi 2555, 6,5 upaı jınady).
Qazaqstandyq shahmatshy Álisher Súleımenov qola medalǵa ıe boldy (FIDE reıtıngi 2463, 6,5 upaı).
Tórtinshi oryndy Úndistannan kelgen grossmeıster Abhımanıý Pýranık ıelendi (FIDE reıtıngi 2555, 6,5 upaı).
Áıelder arasynda «Azııanyń shahmat tájin» úndistandyq shahmatshy Dıve Deshmýh ıelendi (FIDE reıtıngi 2389, 7,5 upaı).
Kúmis medaldi Úndistan grossmeısteri Marı Ann Gomes ıelendi (FIDE reıtıngi 2315, 6,5 upaı).
Qola medalǵa Mońǵolııa grossmeısteri Bathýıagıın Mongontýýl ıe boldy (FIDE reıtıngi 2397, 6,5 upaı).
TOP-5 úzdik oıynshylar qataryna qos jerlesimiz Ksenııa Balabaeva (FIDE reıtıngi 2186) jáne Ámına Qaıyrbekova (FIDE reıtıngi 2146) kirdi.
Alty jeńimpaz: 4-ýi erler arasynda, 2-ýi áıelder arasynda FIDE-2023 álem kýbogyna joldama aldy.
Almatyda klassıkalyq shahmattan bólek 3 maýsymda blıtsten Azııa chempıonaty ótti. Onda qazaqstandyq FIDE sheberi, Semeıden kelgen 20 jastaǵy Arystan Isanjýlov jeńiske jetti (standart reıtıngi - 2408, blıtstegi reıtıng – 2450).
Ekinshi oryndy úndistandyq shahmatshy Venkatesha Pranava ıelendi.
Úshinshi orynǵa qazaqstandyq grossmeıster Denıs Mahnev ıe boldy.
Áıelder arasynda qazaqstandyq shahmatshy, FIDE halyqaralyq sheberi Ksenııa Balabaeva altyn medalǵa ıe boldy (standart reıtıngi - 2186, blıts reıtıngi – 2113).
Kúmis medalǵa Úndistan shahmatshysy Dıve Deshmýh ıe boldy.
Qola medalǵa mońǵol shahmatshysy Týrmýnhıın Mýnhzýl ıe boldy.
Sondaı-aq týrnır aıasynda klassıkalyq shahmat oıyndarynyń eki seansy ótti. 5 maýsymda ataqty moldovalyq shahmatshy Vıorel Bologan № 1 oblystyq balalar úıiniń tárbıelenýshilerimen oınady, 7 maýsymda qazaqstandyq grossmeıster, 20 jasqa deıingi jasóspirimder arasyndaǵy álem chempıony Darmen Sádýaqasov 14 taqtada bir mezgilde oıyn seansyn ótkizdi.
«Jarystyń saltanatty jabylý sharasyna Almaty qalasy ákiminiń orynbasary Ásem Núsipova men Azııa shahmat federatsııasynyń (ACF) prezıdenti Sheıh Sultan bın Halıfa Ál-Nahaıan qatysyp, sóz sóıledi. Ásem Núsipova qala ákimi Erbolat Dosaevtyń atynan Almaty qalasyn týrnırdiń qojaıyny retinde tańdaǵany úshin Azııa shahmat federatsııasyna jáne týrnırdi joǵary deńgeıde ótkizgeni úshin chempıonatty uıymdastyrýshy, demeýshilerge alǵysyn bildirdi.
Sheıh Sultan bın Halıfa Ál-Nahaıan týrnırdi uıymdastyrý, sheteldik qonaqtardy qabyldaý jáne chempıonat sheńberindegi basqa da is-sharalarǵa joǵary baǵa berdi. Ol sondaı-aq 2024 jyly Qazaqstanda shahmattan balalar arasynda Azııa chempıonaty ótetinin jetkizdi.
Jeńimpazdardy marapattaý rásimine Qazaqstan shahmat federatsııasynyń (QShF) birinshi vıtse-prezıdenti Dármen Sádýaqasov pen Freedom Broker basqarma tóraǵasynyń orynbasary Túsip Núkenov qatysty», - dep habarlady QShF baspasóz qyzmeti.
Eske salsaq, Almatyda 18 eldiń shahmatshylary baq synaıtyn Azııa qurlyqtyq chempıonaty bastalǵanyn habarlaǵanbyz.
