Almatyda shahmattan álem chempıonaty resmı túrde bastaldy
Saltanatty ashylý rásimine halyqaralyq shahmat federatsııasynyń prezıdenti Arkadıı Dvorkovıch, Almaty ákimi Erbolat Dosaev, mádenıet jáne sport mınıstri Dáýren Abaev, álem chempıonatyna qatysýshy elderdiń elshileri, memleket jáne qoǵam qaıratkerleri qatysty.
Dáýren Abaev Memleket basshysy Qasym-Jomart Toqaevtyń quttyqtaý hatyn oqyp berdi.
«Qazaqstanda osy týrnırdi ótkizýge septigin tıgizgeni úshin Halyqaralyq shahmat federatsııasynyń basshylyǵyna rızashylyǵymdy bildiremin. Mundaı bedeldi jarystar elimizde shahmattyń tanymaldylyǵyn arttyrýǵa tyń serpin bereri sózsiz. Búginde qazaqstandyq shahmatshylar balalar arasyndaǵy jáne eresekter arasyndaǵy Azııa jáne álem chempıonattarynda joǵary nátıjeler kórsetip keledi. Olardyń jetistigi óskeleń urpaqty ıntellektýaldy sport túrlerimen shuǵyldanýǵa, aldyna zor maqsattar qoıyp, oǵan qol jetkizýge jigerlendiredi. Biz Qazaqstanda shahmatty júıeli túrde damytýdy jalǵastyramyz jáne Halyqaralyq shahmat federatsııasymen yntymaqtastyqta tabysty jumys isteýge daıynbyz. Bul bizdiń adam áleýetin arttyrý jáne zııatker ult qalyptastyrý jónindegi strategııalyq mindetimizge tolyq saı keledi. Týrnır qatysýshylaryna jarystan umytylmas áser alyp, jarqyn jeńisterge jetýdi tileımin», – delingen Prezıdenttiń quttyqtaý hatynda.
Mádenıet jáne sport mınıstri álem chempıonatyna qoldaý kórsetken seriktesterge jáne qala basshylyǵyna alǵysyn bildirdi.
«Men bul týrnırdiń áseri orasan zor bolatynyna tolyq senimdimin. Týrnırdi el boıynsha myńdaǵan bala baqylap, shahmat oınaıtyn bolady. Bul shahmat týrnıri bizge bolashaqta jańa chempıondar syılaıtynyna senimdimin», – dedi Dáýren Abaev.
Shahar basshysy óz kezeginde álem chempıonatynyń Almatyda ótýi qala úshin úlken mártebe ekenin atap ótti. Ol barlyq qatysýshylarǵa jeńis pen sáttilik tiledi.
Jahandyq dodaǵa 50 eldiń úzdik 290 shahmatshylary qatysady. Ashyq týrnırge 176 oıynshy qatysady. Saıystyń favorıti sońǵy 10 jyldaǵy álem chempıony Magnýs Karlsen (Norvegııa).
Áıelder týrnırinde 100-den astam sportshy baq synaıdy. Qazaqstannyń namysyn álemge áıgili shahmatshylar Jansaıa Ábdimálik pen Bıbisara Asaýbaeva qorǵaıdy.
Chempıonat 26-28 jeltoqsan aralyǵynda rapıd oıyndarymen bastalady, blıts oıyndary 29-30 jeltoqsan aralyǵynda ótedi. Sol kúni jeńimpazdardy marapattaý jáne jarystyń jabylý rásimi bolady.
2022 jyl FIDE shahmattaǵy áıelder jyly dep jarııalandy. Osy is-shara aıasynda 2022 jylǵy 27 jeltoqsanda FIDE basqarýshy dırektory, áıelder grossmeısteri Dana Reıznıetse-Ozola sheberlik synybyn jáne talantty qazaqstandyq qyzdarǵa arnap bir mezgilde oıyn seansyn ótkizedi.
Jarys kúnderi tóreshiler korpýsyna arnalǵan FIDE semınarlary, balalar men barlyq áýesqoıǵa arnalǵan bir mezgilde oıyn seanstary men blıtster, IT saladaǵy baǵdarlamashylar úshin jeke týrnır ótedi.
Týrnırdiń uıymdastyrýshylary FIDE jáne Qazaqstan shahmat federatsııasy. Chempıonat Almaty qalasy ákimdiginiń jáne Qazaqstan Respýblıkasy Mádenıet jáne sport mınıstrliginiń qoldaýymen ótkiziledi.
Shahmat saıysyna bıletterdi satý servısinen alýǵa bolady, balalarǵa kirý tegin. Buǵan qosa, týrnır chess24.com jáne chess.com syndy jahandyq onlaın alańdarda kórsetiledi.
Chempıonat kestesi men baǵdarlamasyn chempıonattyń worldrapidandblitz2022.fide.com saıtynan bilýge bolady.
