Almatyda shahar polıtseıleri kólik dóńgelegin jóndeıtin oryndarǵa tekseris júrgizdi

«Kólik qozǵalysyna kedergi jasap qana qoımaı, jaıaý júrginshiler jolynda tizilip turǵan kólik dóńgelegin jóndeýmen aınalysatyn jabaıy sheberhanalar qala kórkin buzyp turǵandyǵy barshamyzǵa belgili. Al tipten jol jıegine ornalasqan mundaı oryndar jol-kólik qozǵalysyn qıyndatýda. Eń ókinishtisi, osy olqylyqtar saldarynan jol-kólik oqıǵalary jıi tirkelýde. Sondyqtan da azamattardyń qaýipsizdigin eskere otyryp, qala ákimdiginiń bastamasymen, Almaty qalasy ІІD qyzmetkerleri qala kórkiniń buzylýyna jol bermeý maqsatynda birshama qatań sharalardy júzege asyrdy. Dálirek aıtqanda, qalamyzdy abattandyrý men kóriktendirýge sondaı-aq sanıtarlyq normalardyń saqtalýyna baǵyttalǵan «Taza qala» aktsııasy aıasynda keshendi is-sharalar júrgizýdemiz. Tekserý barysynda úlken saýda oryndary men bazarlardyń, túrli oıyn-saýyq oshaqtarynyń mańynda, sonymen qatar, halyq kóp shoǵyrlanatyn oryndarda sanıtarlyq normalar buzylǵandyǵy anyqtaldy», - dedi Almaty qalasy ІІD Qoǵamdyq qaýipsizdik basqarmasynyń bastyǵy, polıtsııa podpolkovnıgi Serik Kenenbaev.

Tekserý barysynda ótken táýlik ishinde Sátbaev kóshesi boıyndaǵy 20 kólik dóńgelegin jóndeýmen aınalysatyn sheberhana qojaıyndaryna qala kórkin buzǵandary úshin ákimshilik jaýapkershilikke tartylyp, aıyppul salynǵan. Sonymen qatar, atalmysh sheberhanalardyń 5-eýinde kóshi-qon zańnamalaryn belden basyp, zańsyz Qazaqstan aýmaǵyna kelip jumys istep júrgen shet el azamattary anyqtalǵan.

«Degenmen de, ekinshi ret qaıta tekserý barysynda keıbir sheberhana qojaıyndary shashylyp jatqan qoqystar men kólik rezeńkelerin jıystyryp, jiberilgen olqylyqtardyń ornyn toltyrdy. Al qandaı da bir ruqsat qaǵazdary joq, dál jol jıegine ornalasqan atalmysh oryndar arnaıy kran kómegimen basqa jaqqa yǵystyrylyp tastaldy. Aldaǵy ýaqytta biz, mundaı oryndardyń joǵary deńgeıde qyzmet túrlerin kórsetýin talap etetin zańnamalyq bastama kóteretin bolamyz. Óıtkeni, mundaı sheberhanalar Almatydaı alyp shahardyń kórkine tikeleı áser etip qana qoımaı, qoǵamdyq tártipke de tıgizer zalaldary kóp», - dep basa aıtty S.Kenenbaev.

Qalalyq tártip saqshylary aldaǵy ýaqytta da «Taza qala» aktsııasyn jalǵastyra otyryp, osy ispettes keshendi arnaıy is-sharalar ótkizetin bolady. Al, ýchaskelik ýákilder men jol polıtsııasy qyzmetkerleri búginde tazalyqqa qatysty tártip buzýshylyqtyń qala sheńberinde birshama azaıǵanyn alǵa tartyp otyr.