Almatyda shaǵyn jáne orta bıznes sýbektileri 22% ósken

ALMATY. QazAqparat - Almatyda shaǵyn jáne orta bıznes salasynda 860 myńnan astam adam eńbek etedi. Bul týraly óńirlik kommýnıkatsııalar qyzmeti brıfınginde Almaty qalasy ákimdiginiń kásipkerlik jáne ınvestıtsııalar basqarmasynyń basshysy Berik Soltanbaev aıtty, dep habarlaıdy QazAqparat tilshisi.

Spıkerdiń aıtýynsha, qala ekonomıkasynyń basym bóligin, ıaǵnı, 57,5%-yn shaǵyn jáne orta bıznes quraıdy. Onda ekonomıkalyq belsendi halyqtyń 83%-y jumyldyrylǵan.

«Qalada barlyǵy 380 myń shaǵyn jáne orta kásipkerlik sýbektisi tirkelgen, bul ótken jyldyń sáıkes kezeńimen salystyrǵanda 22% - ǵa ósken. Jumys istep turǵan shaǵyn jáne orta kásipkerlik sýbektileriniń sany - 323 myń, bul ótken jyldyń sáıkes kezeńinen 39% - ǵa joǵary. Aıtý kerek, megapolıs elimiz boıynsha bul kórsetkishte birinshi orynda tur. Kásipkerlik bastamalardyń arqasynda Almaty búginde el ekonomıkasynyń besten bir bóligin, bıýdjet kirisiniń tórtten birin qamtamasyz etedi. Shaǵyn jáne orta kásipkerlik qala ekonomıkasynyń irgetasy bolyp tabylady. Bıznesti memlekettik qoldaý boıynsha júıeli jumystar júrgizilýde. Jańa jumys oryndaryn qurý maqsatynda qarjylyq jáne qarjylyq emes qoldaý sharalary qoldanylady»,- dedi Berik Soltanbaev.
Spıkerdiń sózinshe, kásipkerlikti qoldaý aıasynda qala kelesi sharalardy usynady:
- jeńildikpen nesıelendirý ( 6% kepilmen 500 mln teńgege deıin, kepilsiz 12% 6 mln teńgege deıin);
- qaryzdar boıynsha paıyzdyq mólsherlemeni sýbsıdııalaý (kásipker úshin túpkilikti mólsherleme 8%);
- ınnovatsııalyq bıznes-ıdeıalardy iske asyrý úshin óteýsiz negizde 5 mln teńgege deıin memlekettik granttar berý;
- qaryzǵa kepildik berý (85% deıin);
- ınvestıtsııalyq jobalar úshin jetispeıtin ınfraqurylymdy júrgizý;
- faktorıngtik mámilelerdi qarjylandyrý (8,5% - dan 100 mln teńgege deıin);
-bıznes-ıdeıalardyń paıda bolýynan bastap qarjylandyrýǵa deıin konsýltatsııalyq qyzmetter kórsetý;
- rezıdentteri salyq jáne kedendik tólemderden bosatý túrindegi preferentsııalarmen qamtamasyz etiletin Indýstrııalyq jáne Arnaıy ekonomıkalyq aımaqtyń aýmaqtarynda jer ýchaskelerin berý;
- ShOK sýbektileri úshin qoljetimdi óndiristik alańdardy usyný (shaǵyn ónerkásiptik parkterde);
- demalys kúnderi jármeńkelerde saýda oryndaryn jeńildikpen jalǵa berý.
Almaty qalasy ákimdiginiń kásipkerlik jáne ınvestıtsııalar basqarmasynyń basshysy atalǵan memlekettik qoldaý sharalary úshin bıyl 48,5 mlrd teńge bólingenin, búgingi tańda jalpy nesıe somasy 84,9 mlrd teńgege 1 119 joba qarjylandyrylǵanyn atap ótti.