Almatyda shaǵyn fýtboldan qyzmettik paryzyn oryndaý kezinde qaza tapqan Balabek Ahmedovty eske alýǵa arnalǵan jarys ótti
ALMATY. 13 aqpan. QazAqparat /Názıra Eleýhan/ - Almatyda Tótenshe jaǵdaılar departamentiniń uıymdastyrýymen atalmysh mekemeniń órtke qarsy garnızonynda shaǵyn fýtboldan qyzmettik paryzyn oryndaý kezinde qaza bolǵan,
№ 6 órt sóndirý qyzmeti bóliminiń serjanty Balabek Ahmedovty eske alýǵa arnalǵan jarys bolyp ótti.
Esterińizge sala keteıik, jyl saıyn atalyp ótetin jarys Almaty qalasynyń TJ departamentiniń Órt sóndirýshi jáne avarııalyq qutqarý qyzmetiniń № 6 Órt sóndirý bólimshesi ujymy bastamashylyǵymen dástúrli túrde ótkizilip keledi. Qaıǵyly oqıǵa 1990 jyly 3 qańtarda Áýezov jáne Abaı kóshesi mańyndaǵy qurylys alańynda tańerteń bolǵan edi. Órt sóndirýshi qyzmettik paryzyn oryndaý kezinde 29 metrlik baspaldaqtan qulap, qaza tapty.
Eki kúnge sozylǵan jarysqa Medıtsınalyq aqparattyq ortalyǵy, Almaty qalasynyń Qutqarý qyzmeti, «Qazavıa qutqarý» AQ, «Órt sóndirý jáne avarııalyq-qutqarý jumystary» MM, Almaty qalasynyń jáne Almaty oblysynyń Tótenshe jaǵdaılar departamentteri ujymynan jasaqtalǵan 21 komanda qatysty.
Týrnır nátıjesi boıynsha Almaty oblysynyń TJ departamentiniń qurama komandasy úzdik oıyn kórsetip, birinshi oryndy jeńip aldy. Ekinshi oryndy Almaty qalasynyń TJD-ne qarasty № 4 Órt sóndirý bólimshesiniń komandasy ıelendi. Al úshinshi oryndy Almaty TJD «Órt sóndirý jáne avarııalyq-qutqarý jumystary» MM №12 órt sóndirý bólimshesi enshiledi.
