Almatyda shaǵyn fýtboldan BAQ ókilderi arasynda S. Berdiqulovty eske túsirýge arnalǵan týrnır ótedi
ASTANA. Sáýirdiń 9-y. QazAqparat /Ernur Aqanbaı/ - Aǵymdaǵy jylǵy mamyrdyń 8-i jáne 9-y kúnderi Almatyda shaǵyn fýtboldan buqaralyq aqparat quraldary arasynda belgili sport jýrnalısi, jazýshy jáne qoǵam qaıratkeri Seıdahmet Berdiqulovty eske túsirýge arnalǵan dástúrli týrnır ótedi,
dep habarlaıdy QazAqparat.
QR Týrızm jáne sport mınıstrliginiń Sport komıteti ótkizgeli otyrǵan týrnırge Qazaqstannyń búkil ortalyq jáne óńirlik baspa jáne elektrondy buqaralyq aqparat quraldary qatysatyn bolady. Aıta keteıik, byltyr bul dástúrli týrnırge 32 komanda atsalysqan edi. Bas júldeni fınalda «Aıqyn» gazetiniń jýrnalısteri jeńip aldy. Olar fınalda «Qazaq entsıklopedıtsııasy» baspasy komandasyn jeńdi. Úshinshi oryndy «Vechernyı Almaty» gazetiniń ujymy ıelendi.
Shyǵarmashylyqqa toly Seıdahmet Berdiqulovtyń (1932 - 1994 j.j.) búkil ǵumyry álemdegi beıbit ári ıgilikti sala - sportpen baılanysty boldy. Qazaqstannyń sport jýrnalıstıkasyndaǵy uly metrdiń eńbekteri otandyq pýblıtsıstıkanyń úzdik týyndylary bolyp tabylady.
