Almatyda Sh. Sátbaevanyń 80 jyldyǵyna arnalǵan eske alý keshi ótip jatyr
ALMATY. Shildeniń 23-i. QazAqparat /Erlik Erjanuly/ - Búgin Almatyda ádebıetshi, professor, fılologııa ǵylymynyń doktory, QR UǴA korrespondent-múshesi Shámshııabaný Qanyshqyzy Sátbaevanyń 80 jyldyǵyna arnalǵan eske alý keshi jáne "Sónbes sáýle" dep atalatyn muraǵattyq kórme ótip jatyr,
dep habarlaıdy QazAqparat.
"Muraǵattaǵy Shámshııabaný Sátbaeva qoryn 2002 jyly jary Orazaı Batyrbekuly óz qolymen tabys etken bolatyn. Ondaǵy qujattar óziniń maǵynasyna, mazmunyna, qundylyǵyna qaraı óte úlken baı qor sanalady. Oǵan qysqasha toqtalyp ótetin bolsaq 1954 jyly Lomonosov atyndaǵy Máskeý ýnıversıtetiniń aspıratýrasynda oqyp júrgen kezde qorǵaǵan alǵashqy ǵylymı eńbegi kandıdattyq dıssertatsııasynan bastap, keıingi kezde jazǵan qazaq ádebıetiniń tarıhynan onyń shetel ádebıetterimen baılanysy týraly jazǵan ǵylymı eńbekteri. Túrli deńgeıdegi konferentsııalar men májilisterde jasaǵan baıandamalary men sóılegen sózderi, estelikteri men ózge avtorlardyń eńbekterine jazǵan pikirleri jáne taǵy basqa da qundy muralary toptastyrylǵan", deıdi QR Ortalyq memlekettik muraǵatynyń bólim bastyǵy Gúlmıra Aýǵanbaeva. Jeke tulǵalardyń arhıvteri men tarıhı qujattyq toptamalarmen jumys jónindegi bólim jetekshisiniń aıtýynsha, Sh. Sátbaeva qory jalpy jurtshylyq úshin ashyq. Ondaǵy qujattarmen kez-kelgen adam tanysyp, zertteý jumystaryn júrgize alady.
2002 jyly qańtar aıynda Almatyda dúnıeden ótken Shámshııabaný Qanyshqyzynyń týǵanyna shildeniń 25-i kúni 80 jyl bolady. Óz ǵumyrynda 4 ǵylym doktory men 18 ǵylym kandıdatynyń jumysyna jetekshi bolǵan ádebıetshi ǵalym týraly endi kúzde respýblıkalyq ǵylymı konferentsııa ótpek. Ony 50 jyl boıy qyzmet jasaǵan Ádebıet jáne óner ınstıýty uıymdastyrǵaly otyr.
