Almatyda Sh. Qaldaıaqovtyń eskertkishin turǵyzý josparlanǵan ýaqytynda júzege aspaýy múmkin
ASTANA. 17 mamyr. QazAqparat - Almatyda ashylýy josparlanǵan Sh. Qaldaıaqovtyń eskertkishi qarajattyń joqtyǵyna oraı ýaqytynda júzege aspaýy ytımal.
Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osy máseleni kótere kele, bıýdjetten qarajat qarastyrýdy ótindi.
Eskere ketetin jaıt, Senattyń bir top depýtattary buǵan deıin Qazaqstannyń halyq ártisi, Qazaqstan Respýblıkasynyń memlekettik syılyǵynyń laýreaty, memlekettik Ánuran avtorlarynyń biri, kórnekti kompozıtor Shámshi Qaldaıaqovtyń shyǵarmashylyǵy men murasyn ulyqtaýǵa baılanysty saýaldar joldaǵan bolatyn. Osyǵan oraı, depýtat Qýanysh Aıtahanov senatorlar usynystarynyń birqatary ret-retimen júzege asyp kele jatqanyna toqtalyp, bul úshin Úkimet basshysyna alǵysyn jetkizdi. Atap aıtqanda Sh. Qaldaıaqov atyndaǵy «Meniń Qazaqstanym» atty án festıvali Astana qalasynda úshinshi ret ótkeli otyr. «Qazaqfılm» kınostýdııasy Qaldaıaqov jaıynda derekti fılmdi túsirýdi de aıaqtaǵan. Astana qalasynyń jańa kósheleriniń birine ataqty sazgerdiń de esimi berilgen.
«Almaty qalasynyń ákimi qalanyń Respýblıka saraıy janyndaǵy saıabaqtan eskertkish ashý úshin 2014 jylǵy 20 naýryzǵa deıingi merzimge ýaqytsha paıdalanýǵa jer telimin berdi. Alaıda eskertkish ornatýǵa qarajat bólinbeýine baılanysty sazger eskertkishi atalǵan merzimde ornatylmaı qalýy múmkin», - deıdi Q. Aıtahanov. Osyǵan oraı, senator Úkimet basshysynan búkil sanaly ǵumyryn ultynyń rýhanı kemeldenýine arnaǵan, bıik rýhty, máńgi óshpes ánderi arqyly halyqty otansúıgishtikke, el men jerge adaldyqqa tárbıeleýge qyzmet etip kele jatqan Sh.Qaldaıaqovtyń atyna saı eńseli eskertkish ornatýǵa bıýdjetten qarjy qarastyrýdy surady.
