Almatyda Seıfýllın-Jansúgirov qıylysyndaǵy aınalma jol qashan bitedi
ALMATY. QazAqparat - Almatyda Seıfýllın-Jansúgirov qıylysyndaǵy aınalma joldyń qurylysy kelesi jyly aıaqtalady, dep habarlaıdy QazAqparat tilshisi.
Bul atalǵan jerde turyp jatqan turǵyndardyń jer ýchaskelerin satyp alýǵa qajetti qarajat jetpeýinen bolyp otyr.
«Seıfýllın-Jansúgirov kóshelerindegi jol aıryǵynyń qurylysyna kelsek, munda shynymen sot sheshimimen bolsyn, kelisim boıynsha bolsyn jer telimin satyp alý qarastyrylǵan. Ótemaqy kólemi de talqylanǵan. Biraq qazir bul jerlerdi satyp almadyq. Oǵan qarajat joq», - dedi qalalyq Jer qatynastary basqarmasynyń basshysy Altynbek Ahmetov.
Onyń aıtýynsha, jerdi satyp alýǵa jumsalatyn qarjy respýblıkalyq bıýdjetten eseptelgen. Alaıda, bıylǵy bıýdjet bekitilip ketkendikten oǵan artyq qarajat qarastyrylmaǵan.
«Osyǵan baılanysty jumystar toqtatyldy. Ótemaqyny tóleý máselesin kelesi jyldyń basynda sheshemiz. Jol aıryǵynyń qurylysy da osy ýaqytqa deıin sozylady», - dedi Altynbek Ahmetov.
Basqarma basshysy jolǵa alynatyn jer ýchaskelerdegi otbasylardyń barlyǵy óz úılerinde turyp jatqanyn aıtty.
Onyń aıtýynsha, turǵyndardy eshkim qýyp, kommýnıkatsııasyn óshirip jatqan joq. Eger olar ótemaqy somasyna qanaǵattanbasa, quzyrly organdarǵa aryzdana alady.
