Almatyda Seıfýllın dańǵylynyń bir bóligi birneshe kúnge jabylady
ALMATY. QazAqparat – Almatynyń Seıfýllın dańǵylynda ortasha jóndeý jumystary kestege sáıkes júrgizilip jatyr. Bul týraly qalalyq mobıldilik basqarmasynan málim etti, dep habarlaıdy QazAqparat tilshisi.
Basqarma málimetinshe, Almaty-1 temirjol vokzalynan Jumabaev kóshesine deıingi bóliginde polımerli asfaltbeton jabynyn tóseý aıaqtalyp, kólik qozǵalysy ashyldy.
Endi Jumabaev kóshesinen Aqan Seri kóshesine deıin polımerli asfaltbeton jabynyn tóseý júrgiziledi.
«Atalǵan ýchaskede 8 tamyz túngi saǵat 23.00-den 10 tamyz tańǵy saǵat 07.00-ge deıin polımerli asfaltbeton jabynyn tóseý jumystarynyń júrgizilýine baılanysty kólik qozǵalysy ýaqytsha tolyq shekteledi», - dep habarlady Almaty qalalyq mobıldilik basqarmasynan.
Júrgizýshiler Aqan Seri, Jansúgirov kósheleri arqyly aınalyp óte alady.
«Seıfýllın dańǵylyn qıyp ótetin Jumabaev, Aıbasov, Dýlatov, Kotelnıkov, Aqan Seri kóshelerinde qozǵalys ashyq bolady»,- delingen habarlandyrýda.
