Almatyda Seıdahmet Berdiqulovty eske alý keshi ótti
ALMATY. 9 qarasha. QazAqparat - Almaty qalasynda Qazaqstan Jazýshylar odaǵy, QR Mádenıet jáne aqparat mınıstrligi jáne Almaty qalasy ákimdiginiń qoldaýymen Seıdahmet Berdiqulovty eske alýǵa arnalǵan kesh ótti.
Bıylǵy jyly jýrnalıst jáne jazýshy Seıdahmet Berdiqulov 80 jasqa tolatyn edi. Ol Qazaqstan tarıhyna óziniń búkil ómirin sportqa arnaǵan jarqyn jýrnalıst, pýblıtsıst jáne qoǵam qaıratkeri retinde endi.
JOO-ny bitirgen soń, Seıdahmet birden jýrnalıstıka álemine enip, sóz sheberi boldy. Ol jastar jáne sport týraly jazdy. Keshte onyń dostary eske alǵandaı, Seıdahmet Berdiqulov uzaq jyldar boıy «Lenınshil jas» gazetin basqara otyryp, ony naǵyz patrıottyq basylymǵa aınaldyrdy. Jumys istegen jyldary S. Berdiqulov búgingi kúni Qazaqstan baspasózinde tabysty eńbek etip júrgen bir shoǵyr qalamy júırik jas avtorlarǵa óz tájirıbesin úıretti.
«Ol erekshe jazdy, onyń tili men túsindirý tásili aıtarlyqtaı erekshelenetin. Jáne qazirgi ýaqytqa deıin sport týraly onyń ózi jazǵandaı eshkim jaza almaıdy. Sebebi, ol sport taqyrybyndaǵy materıaldardy túsindirýde qazaqtyń ádebı sózin óte jumsaq ári yńǵaıly qoldanatyn», - dedi aqyn, ádebıet synshysy Qýanyshbaı Qurmanǵalı.
1994 jyly sport jýrnalısterine Berdiqulov atyndaǵy syılyq belgilendi. Seıdahmet Berdiqulov óziniń sońynda úzdik sport reportajdarynan basqa, birneshe tilge aýdarylǵan kitaptaryn qaldyrdy. Solardyń arasynda «Sol oramal joǵalmaıdy», «Júrek uıyqtaýdy bilmeıdi», «Jumyr jerdegi teńbil dop»,«№ 3 podezd», «Aspannan shuǵa jaýǵan kún» tárizdi týyndylary bar.
