Almatyda servıstik polıtsııa pılottyq jobasy iske qosylady

ALMATY. QazAqparat - Qala ákimi Baqytjan Saǵyntaevtyń tóraǵalyǵymen Іshki ister mınıstri Erlan Turǵymbaevtyń qatysýymen ótken onlaın keńes barysynda qoǵamdyq qaýipsizdik máseleleri boıynsha polıtsııa jumysyna servıstik ádisti engizý tujyrymdamasy tanystyryldy, dep habarlaıdy QazAqparat tilshisi.

Baqytjan Saǵyntaev qoǵamdyq qaýipsizdikti qamtamasyz etý ákimdik jumysyndaǵy mańyzdy basymdyqtardyń biri ekenin aıtty. Osy maqsatta ýchaskelik ınspektorlarǵa basa nazar aýdara otyryp, polıtsııa jumysyn jańǵyrtý jumystary júrgizilýde.

Jaıaý patrýldeý kúsheıtilýde, barynsha krımınogendi ýchaskelerge polıtsııanyń modýldi pýnktteri ashylyp jatyr. Sonymen qatar, beınebaqylaý jelisi keńeıip, qaýipsizdikti baqylaýdyń ıntellektýaldy júıeleri engizilýde. Qabyldanǵan sharalar bıylǵy jyldyń 4 aıynda qylmys deńgeıin 21,3%-ǵa tómendetýge múmkindik berdi. Bul rette qylmystyq quqyq buzýshylyqtardy anyqtaý deńgeıi 12,4%-ǵa jaqsartyldy.

Eýropadaǵy qaýipsizdik jáne yntymaqtastyq uıymynyń Nur-Sultandaǵy baǵdarlamalar keńsesiniń qoldaýymen júzege asyrylǵan polıtsııa jumysynyń servıstik modeliniń pılottyq jobasy «basqarýdan» «qyzmetke» kóshýdi kózdeıdi. Sonymen qatar, polıtsııa azamattyq qoǵamnyń qatysýymen qylmystar men quqyq buzýshylyqtardyń belsendi aldyn alýǵa baǵyttalǵan.

«Pılottyq joba quqyq buzýshylyqtyń aldyn alý salasyndaǵy memlekettik organdardyń jumysyn uıymdastyrý tásilderin ózgertýge kómektesedi. Bul ádis Ulybrıtanııada, Kanadada qoldanylady. Biz solardyń tájirıbesin engizip otyrmyz», - dep atap ótti Qazaqstannyń ishki ister mınıstri Erlan Turǵymbaev.

Erlan Turǵymbaev Almatyda ishki ister mınıstrligimen jáne EQYU-nyń konsýltatsııalyq qoldaýymen vedomstvoaralyq top qurýdy usyndy. Ol belgili bir aımaqtaǵy qylmystyq ahýaldy egjeı-tegjeıli taldaýǵa, sonymen qatar qaýipsizdik máseleleri boıynsha jergilikti qoǵamdastyqpen jemisti baılanys ornatady.

Baqytjan Saǵyntaev bul usynysty qoldap, jobanyń maqsaty – qoǵamnyń qajettilikterine jaýap beretin jáne onymen seriktestikte jumys jasaıtyn kásibı, ókiletti, esep beretin organ qurý ekenin basa aıtty.

«Biz polıtsııaǵa azamattarǵa kómektesetin, olardyń máselelerin sheshetin qyzmet retinde qaraımyz», - dedi Baqytjan Saǵyntaev.

Megapolıs ákiminiń tapsyrmasy boıynsha jańa tujyrymdama Almatynyń barynsha kúrdeli shaǵyn ýchaskelerinde synaqtan ótetin bolady.