Almatyda serýenge shyqqan 26 adam qamaýǵa alyndy
ALMATY. QazAqparat – Almatyda serýenge shyqqan 26 adam qamaýǵa alyndy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, ótken táýlikte QR Ákimshilik quqyq buzýshylyq týraly kodeksiniń 476-baby 6-bóligine sáıkes tótenshe jaǵdaı rejımin buzǵany úshin, atap aıtqanda kóshede negizsiz júrgen 59 adam ákimshilik jaýapkershilikke tartyldy. Onyń 26-sy qamaýǵa alyndy, 32 adamǵa aıyppul salyndy, bireýine eskertý jasaldy.
«Jalpy tótenshe jaǵdaı rejımi engizilgeli beri 105 adam ákimshilik jaýapkershilikke tartyldy, onyń 46-sy qamaýǵa alynyp, 55 adamǵa aıyppul salyndy. Al keshe mamandandyrylǵan aýdanaralyq ákimshilik soty QR Ákimshilik quqyq buzýshylyq týraly kodekstiń 476-babyna sáıkes 65 ákimshilik materıaldy qarady» – dep habarlaıdy Almaty qalalyq PD baspasóz qyzmetinen.
