Almatyda serozdy menıngıtti juqtyrǵandar sany 4,1 ese ósken
Almaty qalalyq sanıtarııalyq-epıdemıologııalyq baqylaý departamentiniń málimeti boıynsha, jyl basynan beri Almatyda serozdy menıngıttiń 157 jaǵdaıy tirkelgen. Bul ótken jyldyń sáıkes kezeńimen salystyrǵanda 19,1%-ǵa artyq.
«157 jaǵdaıdyń 49-y zerthanalyq túrde rastaldy (2021 jyly – 2 jaǵdaı): oqýshylar arasynda – 36,7%, uıymdastyrylmaǵan balalar arasynda – 16,3%, mektepke deıingi balalar uıymyna baratyn balalar arasynda – 42,9%, pedagogtar – 2,0% jáne ózge kontıngentter arasynda 2,0% qurady», - delinedi habarlamada.
Vedomstvo serozdy menıngıt enterovırýs (ishek vırýsy) tektes vırýstardan týyndaǵan aýrýlardyń arasynda jıi kezdesetinin habarlady.
«Aýrýdy aldyn alý úshin kelesi qaǵıdalardy bilý qajet:
- tek qana qaınatylǵan nemese býtylkadaǵy sýdy ishý kerek;
- tamaq isher kezde jáne dárethanadan shyqqan soń qoldy sabynmen jýyp, jeke jáne qoǵamdyq gıgıenanyń qaǵıdalaryn qatań saqtaý qajet;
-túshkirgende jáne jótelgende bir ret qoldanatyn maılyqtardy paıdalaný qajet;
- jemister men kókónisterdi qoldanar aldynda aldymen şetkamen, sosyn qaınap turǵan sýmen muqııat jýý kerek;
- tek qana arnaıy kelisilgen oryndarda shomylý kerek jáne sýdy jutpaýǵa tyrysý kerek;
- aýrý deńgeıi kóterilgen kezeńde haýyzdarǵa, akvoparkterge jáne ashyq sý qoımalaryna barýdan bas tartý kerek;
- jeke adamdardan jáne saýda oryndaryna jatpaıtyn jerlerden tamaq ónimderin satyp almaý kerek;
- bólmelerdi jıi jeldetip, sýly tazalaý jumystaryn júrgizý qajet;
- aýyrǵan balalardy bala-baqshaǵa jáne mektepke jebermeý kerek», - dep eskertti vedomstvoda.