Almatyda Serke Qojamqulov týraly derekti fılmniń tusaýkeseri ótti
ALMATY. QazAqparat – Almatyda QR Ulttyq kitaphanasynda rejısser Alekseı Kamenskııdiń «Seraly Qojamqulov» atty derekti fılmniń tusaýkeseri ótti, dep habarlaıdy QazAqparat tilshisi.
Derekti fılm XX ǵasyrdyń basynda elimizde tuńǵysh Ultyq teatrdyń negizin salýshylardyń biri Serke Qojamqulovtyń ómiri men shyǵarmashylyǵy týraly baıandaıdy. Tabıǵı talantymen sahna ónerin meńgergen óner ıesi qazaq kınosynyń akterlik mektebin de qalyptastyrýǵa tikeleı aralasqan.
« Serke Kojamqulov – ulttyq kásibı teatr jáne kıno óneriniń negizin qalaǵan has sheberlerdiń biri. Asharshylyq pen soǵysty óz kózimen kórgen daryn ıesi eshbir qıyndyqtarǵa qaramastan ómiriniń sońyna deıin ónerge adal qyzmet etti», - dedi Qazaqstan kınematografıster odaǵynyń tóraǵasy Ermek Tursynov.
Aıta ketsek, fılmniń tusaýkeserine Serke Qojamqulovtyń qyzdary – Renata, Balym, Márıam jáne Salıha Qojamqulovalar qatysyp, ákeleri týraly estelikterimen bólisti.
«On bir baladan qazir beseýimiz ǵana qaldyq. Ákemiz bilimge qatty kóńil bóletin, sonyń arqasynda búginde árqaısymyz aıaǵymyzǵa nyq turyp, óz ornymyzdy taptyq. Menen basqasy barlyǵy da ata-anamyzdyń jolyn qýyp, óner áleminde qyzmet etip keledi. Osyndaı tamasha týyndyny shyǵarǵan «Qazaqfılm» kınostýdııasyna, kartınanyń túsirý tobyna alǵysymdy bildiremin», - dedi akterdiń qyzy Renata Qojamqulova.
«Qazaqfılm» kınostýdııasynyń prezıdenti Arman Ásenov Serke Qojamqulovtyń jarqyn beınesi men ult ónerine sińirgen eńbegi halyq jadynda máńgi saqtalatynyn aıtty.
«Búgingi keshke qatysyp otyrǵanyma óte qýanyshtymyn. Ultymyzdyń birtýar akteri, qaıtalanbas tulǵasy Seraǵamyzdyń artynan qalǵan qyzdary búginde elimizdiń mádenıetine eleýli úles qosyp júrgen asyl jandar. Bıyl aǵamyzdyń bul dúnıeden ótkenine 40 jyl bolypty. Seraly aǵamyzdyń jarqyn beınesi men ult ónerine sińirgen eńbegi halyq jadynda máńgi saqtalatynyna senimdimin», - dedi «Qazaqfılm» kınostýdııasynyń prezıdenti Arman Ásenov.
«Qazaq Renessansy» tsıkly boıynsha túsirilgen kınotýyndyny QR mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirdi.
