Almatyda «Sergek» júıesiniń jańa fýnktsııasy jalǵan nómirli kólikterdi anyqtaýda
ALMATY. QazAqparat – Almatyda «Qorǵaý Sergek» baǵdarlamasynyń kómegimen jalǵan nómirli kólikterdiń júrgizýshileri anyqtalyp, ustalýda, dep habarlaıdy QazAqparat tilshisi.
«Almatyda «Qorǵaý Sergek» júıesi 2021 jyldyń qarasha aıynan bastap pılottyq rejımde qoldanylyp keledi. Onyń kómegimen jyl basynan beri jalǵan memlekettik nómirmen júrgen (QR ÁQbK-niń 590-baby 3,4 bóligi) 171 júrgizýshi ustalyp, ákimshilik jaýapkershilikke tartyldy. Kólikter aıyppul turaǵyna qoıyldy. Sonymen qatar, ótken táýlikte arnaıy jaryq-dybys jáne daýysty sıgnaldardy zańsyz paıdalanǵan eki kólik júrgizýshisi, 7 mas júrgizýshi kólikti basqarýdan shettetildi», - dedi Almaty qalalyq polıtsııa departamentiniń jergilikti polıtsııa qyzmeti basqarmasynyń bastyǵy, polıtsııa polkovnıgi Manap Sattarov.
Onyń aıtýynsha, qazirgi ýaqytta Almatyda jalǵan memlekettik nómirmen júretin, kólikke arnaıy belgi berý qurylǵylaryn ornatqan jáne kólikti mas kúıde júrgizgen adamdardy anyqtap, jaýapqa tartý jumystary jalǵasýda.
«Ótken táýlikte qala joldaryndaǵy «Qorǵaý Sergek» júıesi jalǵan nómir paıdalanǵan 11 júrgizýshini anyqtady. Olar jalpy somasy 12 mıllıon 680 teńgeni quraıtyn 790 quqyq buzýshylyq jasaǵan. Bul kólikter arnaıy aıyppul turaǵyna ornalastyryldy», - Manap Sattarov.
Aıta keteıik, aıyppul salynǵandar arasynda – 1992 jyly týǵan A.esimdi azamat bar. Oǵan jol qozǵalysy erejesin 92 márte buzǵany úshin 1 mln 541 myń teńge kóleminde aıyppul salyndy.
