Almatyda «Sergek» kameralarynyń sany artady

ALMATY. QazAqparat - Jyl sońyna deıin Almaty kóshelerine 707 «Sergek» kamerasy ornatylady. Bul týraly qala ákimdiginiń baspasóz qyzmetinen málim etti, dep habarlaıdy QazAqparat tilshisi.

Ákimdiktiń aqparatyna sáıkes, Almatyda «Vision Zero Almaty» tujyrymdamasy aıasynda jol qaýipsizdigin qamtamasyz etý sharalary iske asyrylýda.

Almaty ákimniń tapsyrmasy boıynsha megapolıste jyl sońyna deıin qosymsha 707 «Sergek» kamerasy iske qosylady. Olardyń 400-i kóshe qıylystaryna, 307-si jol jıegindegi ýchaskelerde ornatylady. Bul júıe jyldamdyqty arttyrǵan, baǵdarshamnyń qyzyl túsine júrgen, qyzyl syzyqtan asyp ketken jáne avtobýs jolaǵymen júrgen kólikterdi birden sýretke túsiredi. Budan ózge, jańa tehnologııany paıdalaný qylmystyń izin sýytpaı, jedel ashýǵa yqpal etedi.

Polıtsııa departamenti ókilderiniń pikirinshe, mundaı beketterdiń kóp bolýy kólik júrgizýshilerdi tártipke shaqyrady. Aıyppul tóleý kezinde adam faktory joıylady. Tártip buzýshylyq avtomatty túrde birden málimetter bazasyna túsedi jáne kólik ıesine jiberiledi.

Eske salsaq, bul júıe aǵymdaǵy jyldyń naýryz aıyna deıin 8 aı boıyna testilik rejimde jumys jasaǵan. Osy kezeń ishinde qalanyń barynsha qaýipti aımaqtary anyqtaldy, endi «Sergek» sol jerlerge ornatylady.

Aıta keterligi, Nur -Sultanda «Sergekti» qoldaný onyń tıimdi ekenin kórsetti. Astanalyq avtomobılıster men qala qonaqtarynyń júrgizýshilik mádenıetiniń arqasynda 2017 jylmen salystyrǵanda joldaǵy ólim eki ese tómendedi. Eger elordada 2017 jyly jol apattarynan 60 adam kóz jumsa, 2018 jyly 34 adam ajal qushqan.